Aerolinea Mexicano Volaris a anuncia ayera e lansamento di un programa di vuelonan pa 1 dollar, pa facilita cu e migrantenan Centro Americano cu situacion iregular por bolbe bek na nan pais di origen.
“E aerolinea Mexicano di baho costo cu ta opera na Mexico, Merca, y Centro America ta lansa e programa ‘Reuniendo Famia’, segun e compania aereo a informa den un comunicado.
E programa aki ‘ta invita e migrantenan Centro Americano cu situacion di migracion iregular, cu ta na Mexico y kier regresa boluntariamente pa nan pais di origen’, pa biaha pa un dollar (mas impuesto).
E vuelonan lo cuminsa dia 30 di juni desde distinto ciudad di Mexico, por ehempel Tijuana, Ciudad Juarez, Guadalajara y Ciudad de Mexico, cu asiento disponibel pa Costa Rica, El Salvador y Guatemala.
“E migrantenan di edad mas avansa lo mester presenta su Documento Unico di Identidad (DUI) so, y e menor di edad mester presenta cu partida di nacemento of paspoort”, nan a indica.
Pa e compania, esaki ta ‘un alternativa pa e solucion di e fenomeno di migracion’ cu a sosode den ultimo lunanan.
For di october di 2018 a registra un aumento di migrantenan, principalmente Centro Americano, kende ta drenta cada dia pa Mexico cu e obhetivo di yega na Merca, loke a causa un crisis entre e dos pais.
Cu e aumento di migrantenan iregular y di solicitante di asilo cu ta yega na Merca, presidente Trump a menasa dia 30 di mei pasa cu impone impuesto pa tur e producto Mexicano.
