Gobierno di Mexico ta considera tuma accion legal contra Merca despues cu ocho ciudadano Mexicano a perde nan bida den e tiroteo na El Paso, Texas. Asina canciyer di Mexico, Marcelo Ebrard a bisa diadomingo.
Durante un conferencia di prensa na Ciudad di Mexico, Ebrard a califica e tiroteo como un acto di terorismo contra Mexicano na Estadonan Uni y a bisa cu gobierno Mexicano lo analisa si tin prueba suficiente pa solicita extradicion di e homber arma pa enfrenta acusacion hudicial na Mexico.
Den un video publica riba su pagina di Twitter, Ebrard a bisa cu loke a sucede na El Paso tabata “inaceptabel” y cu “e prome accionnan hudicial” cu gobierno Mexicano lo tuma lo ta di acuerdo cu derecho internacional.
“Mexico lo kier expresa su mas profundo condena y rechaso pa e acto barbaro aki unda homber y muhenan Mexicano inocente a ser asesina,” Ebrard a bisa. “Nos ta indigna, nos no ta apoya e cultura di odio.”
Ebrard a bisa tambe cu presidente di Mexico, Andres Manuel Lopez Obrador, a duna orden pa tuma medida legal rapido pa protege prome e famianan afecta y despues “pa Mexico por exigi proteccion pa e comunidad Mexicano na Merca.”
Presidente di Mexico Lopez Obrador a bisa ayera cu e ta spera cu e tiroteonan di fin di siman na Merca lo hiba na mas control riba arma y reglamento nobo,y a considera cu tanto democrata como republicano a pone poco atencion na e tema aki.
“Ta mi opinion, pero mi ta kere cu mester debati y analisa e tema aki na Merca, (…) cu por conduci na cambio di nan leynan,” Lopez Obrador a bisa den su conferencia di tur dia, cu ayera a tuma luga na Valle de Bravo, na estado Mexico.
