Diasabra pasa, autoridadnan Mexicano a disolve un caravana di 2.000 migrante cu a sali for di sur di Mexico cu speransa di por yega na Merca, en medio di e dificultadnan cu cada biaha ta mayor pa haya un permiso cu cual nan por circula na e pais.
Hopi di e personanan aki, cu a sali trempan for di Tapachula, Chiapas, tabata desde varios siman pasa na e ciudad casi na nort di frontera cu Guatemala, den espera di nan documento Mexicano di residencia of transito. E migrantenan ta di Centro America, Caribe y Africa.
Nan a bandona nan pais di origen pa huy di violencia of den buskeda di oportunidadnan pa por tin un bida miho.
“Mi kier pasa door di Mexico, mi no kier biba akinan” , e migrante Hondureño, Amado Ramírez a bisa y a señala cu el a biba riba e cayanan di Tapachula cu su yiunan y su casa, na espera cu autoridadnan Mexicano haci entrega di nan visa di transito. “Nos ta para akinan”.
E grupo a avansa 40 kilometro riba un caretera bou supervision di funcionarionan di derecho humano prome cu agentenan federal y elemento di Guardia Nacional a obstrui nan paso.
Nan a ser deteni y subi riba trucknan. Autoridadnan a nenga di bisa na cua luga nan tabata hiba e migrantenan.
“E caravana no ta existi mas”, Irineo Mujica, Defensor di Derecho Humano di Migrantenan, kende tabata yuda otro migrante pa busca un menor di edad, a bisa.
Cu frecuencia, Mexico ta deporta migrantenan den avion pa paisnan manera Cuba y Honduras.
Sinembargo, e deportacion mas dificil ta ora ta trata di migrantenan di paisnan lehano, di Africa, algun di cual ta falta di infrastructura pa ricibi nan.
