(EFE) – Diasabra ultimo autoridadnan Mexicano a aresta 53 migrante, e mayoria di nan tabata di origen centro Americano cera den un cas na Ciudad Juarez, frontera cu Texas (Merca).
Segun autoridadnan, di e migrantenan 10 ta hende homber y dos hende muhe di Guatemala, 33 homber y seis muhe di Honduras, un homber di El Salvador y un Mexicano.
Secretario Municipal di Siguridad Publico, Raul Avila, a informa cu e corporacion a ricibi un yamada di un ciudadano cu a denuncia cu den e cas tabatin personanan secuestra.
“Nan tabata den condicionnan inhumano, nan tabatin un siman akinan. Nan tabatin e intencion di crusa e frontera pa Merca. Pero pa e condicionnan di e domicilio aki, nos por mira cu e luga ta wordo utilisa pa e actividadnan aki”, el a expresa.
Sinembargo, e Hondureño Adilson Ramirez, un di e migrantenan a declara cu nan no a wordo maltrata y cu nan tabatin espacio pa prepara nan cuminda.
Segun Comision Nacional di Derechonan Humano (CNDH), un promedio di 54 migrante ta wordo secuestra na Mexico pa dia, nan ta wordo utilisa pa gruponan di crimen organisa pa trata di persona.
E region ta bibando un ola di migracion sin precedente y den ultimo añanan a produci varios caravana di centro Americanonan cu ta huy for di nan pais pa Mexico y Merca.
Ehemplo di e fluho aki ta cu Comision Mexicano di Ayudo pa Refugiado (Comar) a ricibi 31.842 solicitud di asilo na e prome cuatro luna di 2021, un aumento di casi 75% compara cu 18.142 di e mesun periodo di aña 2020 y 18.527 di 2019.
Segun Oficina di Aduana y Proteccion Fronterisa di Merca (CBP) na april ultimo a wordo deteni 178.120 persona sin documento cu a crusa e frontera cu Mexico, e cifra mas halto pa e luna ey cu a wordo registra for di aña 2000.
