(TheNewYorkTimes) – Un capo di droga condena pa comete e asesinato y tortura di un agente anti-droga a ser captura na nort di Mexico diabierna ultimo, segun funcionarionan Mexicano a informa.
E capo di droga, Rafael Caro Quintero a ser captura den un operativo conhuntamente cu Marina Mexicano y oficina di Fiscalia General di e pais cerca di e pueblo San Simon na Sinaloa, segun funcionarionan a bisa.
Caro Quintero a ser haya pa un cacho di buskeda di nomber Max ora e tabata scondi den mondi, segun un comunicado di Marina Mexicano.
E fiscal general Mericano, Merrick B. Garland a bisa cu Merca ta buscando su extradicion di inmediato.
Autoridadnan a sigura cu nan a emiti dos orden di aresto contra Caro Quintero, asina como un solicitud di extradicion pa Merca. For di 2020, e capo di narcotrafico ta acusa di varios delito di trafico di droga na un tribunal federal di Brooklyn, segun registro hudicial.
Caro Quintero a ser declara culpabel di planea e asesinato na aña 1985 di e agente di DEA Enrique Camarena, conoci como ‘Kiki’, y a ser inclui den e lista di e 10 criminal mas busca di FBI na 2018, despues cu a ser libera na 2013 pa via di un disputa legal. For di e momento ey el a keda como profugo di husticia.
Den un accion cu a causa sorpresa pa autoridadnan Mericano, Caro Quintero ora a cumpli 28 aña di su sentencia di 40 aña, un hues a dun’e su libertad di un manera inespera y a bisa cu el a ser husga di manera no debido.
E tortura y asesinato di Camarena, ken tabata traha como un agente encubierto a ser considera como un punto debil den e guera violento di gobierno Mexicano contra cartelnan di droga y durante hopi tempo tabata un tema di dolor pa funcionarionan di cuerpo di siguridad di Merca.
E brutal asesinato di Camarena ta considera como un di e pio episodio den historia di DEA y durante hopi tempo den interior di DEA, e captura di Caro Quintero tabata un tarea pendiente.
