Loke a sosode dia 17 di october pasa na Culiacan, Sinaloa cu e captura y liberacion di Ovidio Guzman Lopez, yiu homber di Joaquin ‘El Chapo’ Guzman, a pone den evidencia un biaha mas, cu e delincuentenan tin miho arma di candela cu e forsa federal.
Di acuerdo cu e gobierno Mexicano, 7 di cada 10 arma di candela confisca for di delincuentenan ta di fabricacion Mericano, un nacion unda e derecho di tin un arma di candela ta garantisa den Constitucion.
Di 2013 pa 2018 a confisca for di delincuencia Mexicano al menos 28.602 fusil di poder halto, como AK-47, AR-15 y su variacion M16 of Barret caliber 50.
E number grandi di armanan cu ta circula na Mexico a laga consecuencianan grandi: 2018 tabata e aña mas violento, ora a registra 34.202 homicidio. Pero na 2019 lo por kibra e record, te cu luna di september pasa a registra caba 25.890 asesinato.
Algun experto ta calcula cu pa aña ta introduci ilegalmente mas di 210.000 arma a traves di e frontera Mexicano-Mericano.
Cu e problema grandi cu e trafico di arma ta representa desde Merca y despues di un yamada via telefon di presidente di Mexico, Andres Manuel Lopez Obrador cu su homologo presidente di Merca, Donald Trump diabierna pasa pa e echonan cu a sosode na Culiacan; integrante di e gabinete di Lopez Obrador dialuna pasa a reuni cu embahador di Merca na Mexico, Christopher Landau.
Den e reunion tabata presenta e canciyer Mexicano Marcelo Ebrard, e secretario di Siguridad y Proteccion Ciudadano Alfonzo Durazo, asina como e titular di e Forsa Armada.
“Lo bay tin un antes y un despues den e lucha contra e trafico di arma”, e canciyer Mexicano a priminti.
