Na final di 2017, Mexico a suma 29.168 homicidio intencional, e cifra mas halto desde cu a cuminsa informa oficialmente e cantidad aki 20 aña pasa, y cu ta representa un incremento di 27% compara cu 2016, di acuerdo cu e datonan di e sistema nacional di siguridad publico.
Como promedio, e pais a reporta 80 asesinato pa dia y e cifra total a surpasa cu 13% e cantidad di homicidio di 2011, cu te awor a registra e cantidad mas grandi di homicidio, cu 22.409.
Secretar di gobernacion, cu a publica e cifranan, a reporta cu e tasa di homicidio na e pais na 2017 tabata di 20,5 pa cada 100.000 habitante, en comparacion cu e tasa di 19,4 na 2011.
E comisionado nacional di siguridad publico, Renato Sales Heredia, a informa cu desde e aña ey e cifra a baha te yega na 15,96 pa cada 100.000 habitante na 2014. Sinembargo, e tendencia a cambia e aña ey y e cantidad di asesinato a bolbe subi pasando pa 17.336 morto violento na 2014 pa 18.707 na 2015, 22.962 na 2016 y 29.168 na 2017.
Pa prome biaha ademas e estadisticonan ta duna e cantidad di feminicidio cometi na e pais, cu a suma 671 aña pasa, di cual 32 a tuma luga na Culiacán, Sinaloa, cu a converti su mes den e ciudad cu mas homicidio de hende muhe na 2017.
October tabata e luna mas violento aña pasa, cu 2.774 homicidio, mientras cu e estadonan cu a registra mas morto violento tabata: Guerrero (2.529), estado Mexico (2.368), Baja California (2.317) y Chihuahua (2.012).
Den contraste cu esaki, tin e estadonan cu menos morto violento cu tabata: Yucatán, Campeche y Aguascalientes, cu no a surpasa 90 asesinato cada un den henter aña. E estadisticonan oficial tambe a reporta 1.390 secuestro y 5.786 extorsion.
