E cifranan di mucha y adolescente cu a ser presenta na autoridadnan migratorio di Mexico, a aumenta cu casi 132% den e prome seis luna di e aña aki compara cu e mesun periodo di 2018, Instituto Nacional de Migración (Inami) di Mexico a duna di conoce diarason.
“E cifranan preliminar ta indica cu 33.122 mucha y adolescente a ser presenta dilanti autoridad migratorio, di e cifra aki 24.597 tabata acompaña y 8.525 no tabatin acompañante, mientras cu na e mesun periodo di 2018 e cifra di menornan presenta tabata di 14.279”. Inami a informa den un comunicado.
Na 2018 a presenta dilanti di autoridadnan 4.936 mucha muhe y adolescente y 9.343 mucha homber y adolescente, mientras cu durante e prome seis luna di 2019 e cifranan aki a yega te 13.671 y 19.451 di cada un.
Di acuerdo cu e cifrnana di INM, e mayoria di e mucha y adolescente ta di Honduras (17.034), Guatemala (10.069) y El Salvador (3.645).
Di otro banda, e Secretaria di Salud di estado Chiapas, tambe a informa diamars ultimo cu desde januari te juni di 2019 404 baby a nace na frontera sur di e pais, cifra cu ta coresponde pa Hospital di Tapachula so.
E vocero di Instituto di Salud di Chiapas a sigura pa medionan local cu esaki no ta un strategia cu e migrantenan ta haci pa haya nan documento, aunke si ta facilita e posibilidad di regulisa nan situacion na Mexico.
Ningun di e 404 baby cu a nace den e periodo ey no a presenta ningun complicacion of malesa y e mayornan ta di Guatemala, Honduras, El Salvador, Haiti, Nicaragua, Cuba y un di Merca, e funcionario a afirma.
