Gobierno ta anuncia dos candidato pa Ministro Plenipotenciario
Nos no sa ta ki les gobierno ta sacando for di e asunto di gobernador, pero diripiente nos ta ser informa caba na momento cu gobierno ta ‘den duda’ ainda ken ta haya puesto. Como si fuera nos tin algo di bisa den esey; ta algo pa nan mes dicidi ken ta manda pa e puesto aki, cu realmente no ta un puesto di ministro, mas bien un ambtenaar halto. Ora nan caba di delibera, djis laga nos sa ta cual di dos ta bay.
Interesante si ta cu nos ta presencia e ‘resucitacion’ di JD Yrausquin, cu pa basta tempo tabata for di mapa. Ban supone cu ta berdad cu nan a acerca su persona pa e puesto aki y cu no ta djis un manera pa compromete su persona, sin cu debe nada. Nos lo tende di doño di curpa mes a su debido tempo. Sinembargo, si e otro candidato ta un persona cu tin su experiencia den e escenario diplomatico pa e trabao cu el a haci te awor, probablemente den publicidad lo tin poco hende cu lo haci obhecion contra esaki.
Henter e asunto ta parce mas bien un ‘piscamento’ di nos Prome Ministro pa sondea con e nombernan ta cay. Talbes esey sinembargo ta e les di e nombramento di gobernador, unda el a calcula opinion publico totalmente robes y a hay’e ta dal poco stap atras, pasobra e no tabatin sosten pa bay guera. Y ainda ta keda algo cu no por splica.
Den e caso teorico cu un ex ministro di Financia ta bolbe pa tuma un puesto asina, ta pasobra el a tuma e decision cu e no kier un puesto mas den politica mes, sea cu e partido cu el a bandona formalmente, o cu un otro cu cual e por bay eleccion otro aña? Ministro Presidente ta bisando nos anto cu JD ta ‘historia’ como politico? Esey lo ta noticia, pasobra hopi hende tabata spera di mir’e atrobe riba escenario politico local.
Pero, si esey ta berdad, pakico lo e bolbe cu e partido cu a hacie completamente ridiculo den e dianan di e welga di hamber, unda el a bay te Hulanda, haya tur porta cera, mientras cu su PM tabata na telefon cu Rutte y Plasterk henter ora y a regla e asunto aceptando CFT, basta e tres letternan ey no sali den e texto? Ademas, e no a sali di e partido y a kibra silencio na augustus aña pasa, unda el a declara cu e problema no tabata (solamente) gobierno di Reino y gobernador, sino tambe Prome Ministro y su demas coleganan? Anto awor e ta bolbe y ademas den un funcion unda e mester implementa loke su coleganan bis’e pa haci? Si acaso e acepta mes, lo mester yega un momento cu e mester considera tur esaki, pasobra den e negoshi aki ta trata mas cu tur cos di cara.
Birando pa otro tema, nos por ripara cu campaña pa eleccion otro aña a cuminsa di berdad. Di biaha nos por tende atrobe cu nos ministro encarga cu turismo lo ta bay su mes caminda, cu un partido nobo. Nos reaccion ta na e momento aki di “we will see when we get there”. Tin un sin number di pro y contra den e asunto ey cu ta miho reacciona ora cos ta asina leu. Mesun cos pa e speculacionnan kico e supuesto ‘renobacion’ riba lista di e partido grandi den oposicion lo ta. Den tur eleccion tur partido, y sigur e grandinan, por uza poco sanger nobo. Y ora bo ta desea di reforsa bo lista, bo no ta hacie cu candidato cu no ta yama atencion di publico. Al fin y al cabo, ta voto mester y un lista atractivo ta prome prioridad.
Pero mas importante ta kico lo ta e programa cu ta bay presenta. Awor no ta suficiente mas pa limita bo mes na critica gobierno, aunke tin hopi di critica, pero ta importante loke kico por ofrece e votado cu ta importante pa e persona, y alabes ta un mehoracion substancial cu ta haci un diferencia compara cu e maneho hiba den e ultimo shete añanan. Algun di e temanan t’ey grandemente y gobierno ta laat pa coregi rumbo awor ainda.
Por ehemplo den loke ta vivienda popular, unda realmente por papia di un era perdi. Mientras cu nos poblacion ta creciendo y e scarsedad di tereno ta algo cu tabata bisto pa varios aña caba, no tabatin ningun plan pa yuda e Arubano cu cartera chikito cu vivienda pagabel. Tambe e situacion pa loke ta procesamento di sushi ta algo unda por papia di añanan perdi. Y esaki mientras cu e situacion ta birando dia pa dia mas dificil.
Pero esey nos ta haya ora cu ta cos ‘bunita’ so tin prioridad, y de paso cabando cu tur espacio financiero pa varios decada. No ta facil pa conta pueblo esaki.
