Meter pre-pago pa famianan den necesidad cu no tin awa y coriente

Gobierno a bin cu un solucion pa atende cu e problema social di cantidad di famia cu no tin servicionan di awa y coriente na nan cas.

Pa atende cu e problema aki, prome minister, Evelyn Wever-Croes a anuncia cu nan a asigna un seccion den Departamento di Asunto Social (DAS) pa evalua cada caso. Igualmente lo wordo introduci un meter social pre-pago pa e famianan cu ta bin na remarce pa e tipo di ayudo aki. E ta un decision cu aworaki ta den ehecucion y pronto lo wordo anuncia e prome famia cu lo bin na remarce pa esaki.

Aunke ainda no tin un inventarisacion of cifra exacto cuanto famia lo wordo beneficia cu e programa social aki, prome minister Wever-Croes a bisa cu miles di famia nan conexion di awa y coriente a wordo corta. “Tin miles di famia cu literalmente ta biba den scuridad sin awa y sin coriente, e ta algo cu a tene nos semper hopi preocupa.”

El a bisa cu e intencion di su gobierno ta pa baha e prijs di awa y coriente y haci esaki accesibel pa tur hende y pa tur famia. Ta asina cu despues cu nan a delibera den conseho di minister varios biaha riba e topico aki, y awor e ta anuncia cu hunto cu WEB, Elmar y Utilities a bin cu un plan social pa e famianan cu no tin awa y coriente.

Nan ta bay institui un fondo financiero cu ta wordo gefix pa e companianan di utilidad aki. E fondo aki ta bay cay bou supervision di e seccion di guia di asunto social na DAS. E mandatario a indica cu e ayudo aki nan ta structura via e seccion aki cu ta bay atende e problema di forma integral di e famianan cu ta pasando den un tipo di dificultad, ya sea cu nan a perde trabou of nan ta biba di un pensioen di behes of hendenan cu ta biba di onderstand so.

Nan no kier laga esaki den man di cada compania di utilidad, ya cu asina e problema social aki no ta wordo atendi debidamente di un forma integral. Nan ta concentra tur esaki na e seccion specifico di departamento di Asunto Social, ya cu asina nan por haya un bista integral.

Tur peticion lo pasa den un proceso di screening, y mester ta un famia cu berdaderamente ta pasando den un problema social y financiero. E famia beneficia lo haya un conexion pa medio di un tipo di meter pre- pago. Tambe nan ta haya un areglo di pago flexibel y cu facilidad hopi amplio pa e suma cu nan tin habri den pasado.

E prome mandatario ta haya cu lo mas importante di e solucion aki ta cu mesora e famia ta haya e conexion di nobo di e servicionan publico y vital aki.