Relaciona cu e notificacion di gobierno pa cu e rekisitonan pa nombramento di reemplasante di hefe of director den gobernacion, fundacion Rainbow Warriors International a notifica prensa cu, contrario na loke e disposicion di gobierno ta sugeri, esaki no ta resolve casonan actual unda tin departamentonan ta funciona sin e debido capacidad y experiencia presente.

Den un carta dirigi na Mr. Julio Sui, Deputy Regional Director, NACC Office, ICAO y

Dr. Albert Martis, Second Vice-President WMO, Director Meteorological Service Curaçao fecha 25 di mei 2022, e fundacion ta mencion cu nan a tuma nota di cierto desaroyonan cu a tuma luga den Servicio Meteorologico di Aruba pa motibo di accionnan di parti di Gobierno di Aruba desde 2018 cu a causa preocupacion.

Segun e fundacion ta indica den e carta aki, nan tin entendi cu e director di Servicio Meteorologico di Aruba, Dr. Marek Oduber a wordo transferi pa otro departamento gubernamental pa Gobierno di Aruba y cu e servicio Meteorologico di Aruba a keda sin un funcionario competente a cargo, ya cu na e momento di su transferencia, y te cu e fecha, Marek Oduber ta e unico meteorologo di e isla.

Oduber a wordo transferi pa motibo cu el a cuminsa cu un investigacion riba un observador di clima, Rodney Tromp, cu tin vinculo politico cu Gobierno di Aruba. Oduber a cuminsa un caso den corte pa asina revoca e decision pa retir’e como director di Servicio Meteorologico di Aruba, cual el a gana na 2021, pero a pesar di esaki no a reinstala Oduber como director di Servicio Meteorologico di Aruba.

Rainbow Warriors ta splica cu for di informacion cu nan a ricibi di un fuente interno den Servicio Meteorologico di Aruba, na momento cu Oduber a wordo transferi na 2018, Gobierno di Aruba a nombra David Barkmeyer como director interino y e mesun persona cu tabata e obhetivo di e investigacion di Oduber, Rodney Tromp, como subdirector interino.

Segun data cu e fundacion a recopila di Barkmeyer, nan a conclui cu Barkmeyer tabata un pronosticador den e Servicio Meteorologico di Corsou, pues e no ta un meteorologo, ya cu e no tin titulo universitario den meteorologia ni tampoco un titulo universitario den ciencia/matematica/fisica combina cu un educacion di pronosticador.

E observador di tempo cu ta actua como subdirector interino, Tromp, ta sigui un curso meteorologo aeronautico virtual cu eervicio Meteorologico di Spaña. A traves di un investigacion di e fundacion a keda revela cu e no tin titulo universitario tampoco.

Nan ta remarca cu e nivel di educacion di ambos Barkmeyer y Tromp nunca a wordo certifica pa e Departamento di Educacion na Aruba. Departamento di Educacion tin un procedemento di evaluacion basa ariba e oranan di estudio di e programa y e nivel di acreditacion di e institucion universitario.

E fundacion ta subraya cu ademas, nan a wordo informa door di otro observadornan di tempo den Servicio Meteorologico di Aruba cu Barkmeyer ta ofreciendo curso di observacion meteorologico na empleadonan nobo y tambe ta e persona cu ta realisa e examennan.

“Esaki a lanta algun bandera cora den nos organisacion, ya cu Sr. Barkmeyer no ta un meteorologo acredita y ningun otro meteorologo acredita ta supervisando su curso, por lo tanto nos ta preocupa pa e nivel di educacion di e observadornan meteorologico actual na Aruba y nos ta puntra nos mes riba e seguridad di aviacion na Aruba”, e fundacion a enfatisa den e carta.

Di otro banda a keda indica pa e observadornan di tempo den Servicio Meteorologico di Aruba cu nan tabata preocupa pa e plannan di 2015-2017 di Marek Oduber pa automatisa e parti di observacion meteorologico di e Servicio Meteorologico di Aruba, y cu nan tabata preocupa pa nan posibel reincorporacion y posibel retiro como resultado di e automatisacion.

A traves di nan propio investigacion, Rainbow Warriors a encontra cu varios pais den e region ta automatisando observacion meteorologico, incluyendo paisnan den Reino Hulandes, por lo tanto nan a subraya cu nan no ta di acuerdo cu e idea pa no automatisa e observacion meteorologico na Aruba, specialmente ya cu e mesun meteorologonan a indica cu nan no por observa shelo corectamente.

E fundacion ta splica tambe cu Servicio Meteorologico di Aruba ta un AMO (Aeronautical Meteorological Office) y mester cumpli cu e diferente regla di ICAO/WMO, specialmente e convenio tocante Aviacion Civil Internacional, otorgamento di licencia na personal, y Licencia y Habilitacionnan pa personal diferente di tripulantenan di vuelo.

“Nos ta suplica ICAO y WMO pa tuma nos preocupacionnan na serio y audita e Servicio Meteorologico di Aruba ariba e licencia di personal y cumplimento como AMO”, e fundacion a destaca.

Ademas, e fundacion a señala na Dr. Albert Martis, segundo vicepresidente di OMM y director actual di Servicio Meteorologico di Corsou, cu Corsou y Aruba tin un acuerdo mutuo cu ta establece cu ambos Aruba y Corsou mester mantene nan datonan di servicio meteorologico conforme cu e reglanan internacional.

Por ultimo, e fundacion ta enfatisa cu Servicio Meteorologico di Aruba, den su estado actual, falta competencia cientifico pa cumpli cu su funcionnan y realisa e tareanan cu ta wordo spera di e agencia den virtud di e obligacionnan proveniente di UNFCCC y otro convencionnan di Nacionnan Uni, y por lo tanto ta pone den peliger serio e implementacion di Accion ariba Clima y SDG’s cu ta ocupa cu e Adaptacion di Clima y Resilencia, Ciencia y Tecnologia di Clima.

“Pa ta capaz di trata y sirbi di vinculo pa e convencionnan di Nacionnan Uni tocante clima y temanan relaciona, e ta un condicion pa e Servicio Meteorologico di Aruba wordo dirigi pa un meteorologo gradua universitario, y no e director interino actual y e director interino adhunto cu no ta bon cualifica”, Rainbow Warriors a enfatisa.