Ayera den oranan di merdia, servicio meteorologico di Aruba, Meteo, a emiti un alerta pa biento duro y lama localmente bruto. E alerta ta valido te proximo aviso.
Segun Meteo a informa, entre un area di presion halto riba ocean Atlantico y un area di presion abao riba e parti nort di Colombia ta bay tin diferencianan grandi di presion den region Caribe pa proximo dianan.
Pa e motibo aki, biento lo por bay supla cu mas o menos 23 pa 25 nudo, y ta anticipa cu lo por tin rafaganan cu de bes en cuando lo por alcansa entre 35 pa 40 nudo (Beaufort 8.)
Accion di precaucion
Adicionalmente, Meteo ta pidi ocupantenan di boto chikito y usuarionan di lama pa tene e condicionnan aki na cuenta y ta extra cauteloso riba lama.
