Mediante un comunicado di ayera merdia di Meteo Aruba ta pidi na comunidad pa tene na cuenta cu e weather den proximo 24 y 36 ora.

Debi na un pasada di un ola tropical di ayera, biento ta bay ta zwak te modera y direccion zuidoost pa zuid pa proximo 24-36ora.

Cu esaki nan ta pronostica temperatura di 34°C-35°C y den luganan urbano kisas un poco mas halto.

Esaki ta pone cu heat index lo ta halto tambe entre 36°C y 40°C y por causa molester pa hende y specialmente hende grandi.

For di luna di mei ya caba diferente medionan di comunicacion internacional ta batiendo alarma pa un ola di calor cu ta tumando luga den area di Caribe caminda e sensacion di calor por yega hasta 50 grado loke por resulta peligroso pa personanan cu ta traha of haci actividadnan den aire liber.

Pa esaki, Gobierno di Aruba, specificamente minister di Naturalesa Ursell Arends tambe a manda un comunicado di prensa na mei ultimo dirigi pa adultonan mayor indicando cu ola di calor ta peligroso pa adultonan mayor y “como minister di Naturalesa mi ta sali for di e punto di bista cu cambio climatico ta un realidad,” minister Arends a bisa, indicando cu Nacionnan Uni a confirma cu 2023 a kibra tur record mundial pa loke ta temperatura halto, no obstante cu 2023 a cumpli 10 aña consecutivo di aumento di temperatura.

Aunke gobierno no por trece cambio den temperatura mundial, mester haci tur esfuerso pa mitiga e impacto di esaki riba esnan mas vulnerabel. Pa e motibo aki minister Arends a yama un reunion di urgencia cu diferente instancia cu ta atende di un of otro forma cu adultonan mayor.

Segun a informa, e meta di e reunion tabata pa nan hunto cu tur instancia yega na un plan di accion y cooperacion.

“Tur esnan cu ta atende cu adultonan mayor mester traha hunto pa evalua e peligro y prepara un plan con pa mitiga esaki.”

Investigando riba internet a logra haya datonan cu ta indica cu entre 1999 y 2019, mas di 150.000 morto rond mundo tabata relaciona cu ola di calor cada aña, segun un estudio reciente publica na PLOS Medicine di Yuming Guo di Universidad di Monash, Australia, y su ekipo.

Den studio aki, investigadonan a utilisa datonan di e Red di Investigacion Colaborativo Multi- Country Multi-City (MCC) cu tabata inclui mortonan y temperatura diario di 750 luga na 43 pais.

Durante temporada calido for di aña 1990 te cu 2019, exceso di fayecidonan relaciona cu ola di calor a representa 153.078 morto pa aña, un total di 236 morto pa cada dies biyon habitante of e 1% di e mortonan mundial.