Metacorp: nos ta den deliberacion cu gobierno desde februari 2016

E. De Veer Chain Theatres y MetaCorp ta duna nan banda di medaya den e caso cu nan a cuminsa contra gobierno pa un tereno pa construi un cinema nobo. Segun nan gobierno a duna un optie na januari di e aña aki. Awe mainta e caso ta sigui den corte. Tambe nan ta bisa cu for di februari 2016 nan ta den deliberacion cu gobierno. E compania tambe ta bisa cu por construi riba e tereno contrario cu fundacion ABC ta bisa cu tambe a pidi pa forma parti den e caso sumario aki. Segun Aruba Birdlife Conservation (ABC) e tereno ta cay den ‘wetland’ y asina ta proteha.

Pero Metacorp esey no ta e caso. “Na ningun caminda den e ROP ta stipula cu no por uza e tereno eynan pa construi. Loke ta bisa ta cu mester compensa pa e capacidad di retene awa cu lo bay perdi. Den e caso aki, lo percura pa compensa e capacidad di e saliña pa retene awa, no cu mesun cantidad, sino cu dobel mas capacidad, pa proteha nos flora y fauna den e saliña den vecindario y tambe amplia e capacidad di retene awa di e saliña aki.”

‘Ningun daño na naturalesa’
E compania ta sigui splica cu: “Den su reunion di dia 20 di Mei 2016, Conseho di Minister a bay di acuerdo cu e plan y na januari 2017, despues di un aña di investigacion, analisis, preparacion y multiple reunion incluyendo DOW, Infra Team y Ministerio di Infrastructura, a otorga optie na e compania, mara na un lista di condicion, cu entretanto a cumpli cu nan desde maart 2017 caba den consulta y concordancia cu Gobierno.” Durante tratamento di e caso den corte e compania ta bisa cu nan a splica cu durante e 18 lunanan cu a pasa a sinta cu tur e departamentonan di Gobierno envolvi y a garantisa cu no ta haci ningun daño na naturalesa. “MetaCorp, yegando 100 aña di existencia na Aruba, semper a para pa proteccion di nos naturalesa y ta e compania Arubiano cu mas aña di existencia riba nos isla.”

20 miyon di inversion
E compania ta bisa cu lo haci un inversion di 20 miyon florin pa construi un theater di 9 sala, cu e tecnologia iMax riba Sasakiweg na Palm Beach. “Ta sperando riba e permiso di construccion pa por start cu trabounan, cu ta dura 1 aña prome cu entrega e proyecto completo.