Recientemente, Metabolic Foundation a cuminsa cu experimentonan pa colecta data di nos lama, Surfside Science. E luna aki nan a comparti algun imagen mustrando e areanan cu nan a investiga.
Na augustus, Metabolic Foundation a anuncia nan proyecto Surfside Science cu ta enfoca ariba metodonan pa midi calidad di aire, awa di lama, cambionan den e costa y vegetacion den fondo di lama. Christie Mettes, coordinador di e proyecto, a splica cu e proyecto Surfside Science e ta un proyecto cu a haya financiamento di Resembid cu ta un fondo di Union Europeo cu ta wordo maneha door di Expertise France cu ta e agencia di colaboracion pa desaroyo Frances cu ta maneha proyectonan den e teritorionan OCT cu ta inclui Aruba y 11 otro isla di Caribe.
E proyecto aki lo dura un aña y durante e aña ey Metabolic Foundation lo test diferente metodo cu por wordo usa pa automatisa e coleccion di data ariba e costa di Aruba tanto di e area di tera di costa como den lama mes, den un area cerca di costa. Mettes a indica cu e metodonan aki ta mas economico cu metodonan normal y e fundacion ta purba di haci nan mas replicabel pa nan por wordo usa door di hendenan cu no ta cientifico tambe.
Durante weekend, Metabolic Foundation a comparti riba nan pagina di Facebook, Brenchie’s Lab nan sea floor mapping – esta mapa di fondo di lama – pa cual nan tabatin varios sesion di kayak cu boluntario y trahador. E rutanan cu nan a cubri ta marca den cora.
E tram a indica cu tabata un proceso pa nan siña con pa usa tur cos, desde con pa mara e camara GoPro riba e kayak – indicando cu nan no a perde ningun camara den e proceso; con largo e GoPro ta keda cendi, e miho “settings” pa e camara, e miho app of software pa usa, con pa alinea tempo riba gps di celular y GoPro, y con largo un persona averahe por core riba kayak y con grandi e area cu nan por cubri.
“Di tur nos sesionnan nos a logra traha un manual stap pa stap pa bay traha mapa di fondo di lama”, nan a indica riba Facebook. “Dos di nos miembronan ta bay test con claro e manual ta. Nos lo laga sa con esey ta bay.”
Nan a bisa cu e idea ta pa tin un manual pa traha mapa di fondo di lama, pa asina e ciudadano comun por hacie riba nan mes haciendo uso di nan ekipo y aparatonan. Alabes, otro islanan tambe lo tin e informacion aki disponible pa asina traha nan propio mapa di nan lama.
