(NLTimes) – Compania Mericano di tecnologia Meta no lo sigui dilanti cu su plan di construi un centro di dato na Zeewolde, Flevoland, pa awo.

E compania, cual ta dono di Facebook, su plannan a ser ricibi cu hopi resistencia. Meta awo ta bisa cu e “circunstancianan actual a causa cu e plannan mester ser para. E compania ta bisa cu nan kier pa e ta un “bon bisiña” y cu e sosten di e comunidad local ta indispensabel.

E centro di dato, cual lo a ta e mas grandi na Hulanda, inicialmente a gana e sosten di Zeewolde su Conseho di ciudad. Den december, 11 di e 9 consehero a keda di acuerdo pa cambia e plan di zona pa permiti e facilidad construi. Propocisionnan a señala na extra trabao y un aumento den e ganashi di impuesto. Sinembargo, personanan contra di e centro di dato a gana mayoria den e eleccionnan municipal, cabando cu e sosten politico pa e proyecto.

Lider di partido politico Leefbaar Zeewolde tabata positivo tocante Meta su anuncio. “Nos ta contento,” director di partido Tom Zonneveld a agrega den un reaccion inicial. “E ta claramente pospone esaki, y no un ahuste, mas e ta un paso den e direccion corecto.”

Leefbaar y ChristenUnie claramente tabata e oponentenan mas fuerte, sinembargo hunto nan no tabatin suficiente asiento den e conseho prome cu e eleccion a blokia e plan. E Conseho nobo lo ta diferente. Leefbaar a mira e cantidad di asiento bira dobel na 10 den e eleccion municipal reciente. E partido tin intencion di forma un coalicion cu ChristenUnie, cual actualmente tin 4 asiento.

E personanan den oposicion tabata preocupa cu e tamano di e centro di dato, bisando cu esaki no lo bay di acuerdo cu Zeewolde. E cantidad halto di consumo di energia tambe tabata un punto di critica, di mesun manera cu e pregunta tocante con e cayente residuo lo ser utilisa apropiadamente.

“Pa pone di un manera directo, e ta sinti manera cu Zeewolde su residentenan mester djis guli e plan aki,” Zonneveld a agrega. “Nan no tabata inclui apropiadamente den e proceso.

Leefbaar kier Meta su plan cancela completamente. E partido awo ta considerando e proximo pasonan y ta investigando mas detaye, manera kico exactamente “suspension di e plan” ta nifica, Zonneveld a splica. E conseho di ciudad nobo di Zeewolde a drenta oficina diaranson.

E hecho cu Zeewolde anteriormente a bay di acuerdo pa cambia e plan di ona no a garantisa cu e construccion di e centro di dato por cuminsa. Pa esaki, Meta tambe tabatin mester di permiso di e municipalidad y e provincia di Flevoland. Ademas, parti di e tereno den cual e centro di dato tabata di ser construi ta propiedad di e gobierno nacional su agencia di vivienda. E organisacion aki a pone rekisitonan cu mester bay di acuerdo cu e plan di haci e area mas sostenibel pa e uso di e propiedad prome cu un benta por ser conclui.

E suspension no ta un “bon noticia” pa su mes, Hugo de Jonge a bisa. E Gobierno no ta na fabor di e construccion di un centro asina grandi, pa causa di e rekisitonan pa cu espacio y energia. Reglanan mas estricto ta den desaroyo, y a keda decidi luna pasa cu no lo duna mas permiso den e lunanan prome cu esaki ser finalisa.