(AP) – Meta lo aplica proteccion di data di ambos manda, e asina yama end-to-end encryption, pa yamadanan y mensahenan riba su plataformanan Facebook y Messenger, e compania a anuncia diahuebs.
E tipo di proteccion aki ta nifica cu ningun otro persona cu no ta e persona cu a manda y e persona cu ricibi por descifra e mensahenan, nisikiera Meta mes. E chatnan protegi aki cual a ser introduci prome como un funcion opcional den Messenger na aña 2016, awo lo ta e standard pa tur usuario di awo en adelante, segun hefe di Messenger Loredana Crisan. “Esaki a tuma varios aña pa trece pa motibo cu nos a tuma nos tempo pa por haci esaki corectamente,” Crisan a skirbi den un publicacion. “Nos ingenieronan, criptografonan, diseñadornan, expertonan di politica y managernan di producto a traha constantemente pa por reconstrui funcionnan di Messenger for di su fundeshi bin ariba.”
Meta su CEO Mark Zuckerberg a priminti den aña 2019 cu e lo trece e proteccion aki na su plataformanan despues cu e compania di rednan social a sufri un gran serie di scandalnan di perfil halto, notablemente ora cu un analitico di Cambridge a haya acceso na data di usuario. Esnan cu ta boga pa privacidad un biaha mas a pone enfoke riba Meta despues cu investigadornan na Nebraska a revisa mensahenan riba Facebook mientras tabata investiga un aborto cu tabata den violacion di e prohibicion di 20 siman den un estado.
Meta, ken su plataforma di WhatsApp ya caba tin e proteccion di data aki aplica, a bisa cu e funcion por mantene usuarionan safe contra hackernan, estafadornan y criminalnan.
Mientrastanto, esunnan cu ta critica e proteccion aki, autoridadnan y te hasta Meta su reportahe publica den aña 2022 ta nota e riesgonan di e proteccion aki, incluyendo usuarionan cu por abusa di e funcion aki pa sexualmente explota muchanan, facilita contrabanda di hende y plama mensahenan di odio.
