(AP) – Un hues federal a tuma parti di Meta y a habri caminda pa e compania cumpra e compania di realidad virtual Within Unlimited, e creador di e apliacion popular di fitness Supernatural..
Reguladornan federal anti-confiansa a busca manera di por blokia e adkisicion basa riba e hecho cu e lo causa obstaculo den e competencia den e mercado cu ta birando popular den realidad virtual. Sinembargo hues di Distrito Mericano Edward Davila a nenga e Federal Trade Commission su peticion pa un paro preliminar contra e trato. E hues su declaracion a bisa e agencia no a provee suficiente evidencia pa comproba nan punto.
Meta a bisa cu nan lo proceed cu e adkisicion aki di e compania Within Unlimited.
Federal Trade Commission a argumenta Meta su adkisicion di e compania chikito aki, similar na nan argumentonan ora di Facebook su compra di Instagram y WhatsApp, lo causa obstaculo contra competencia den e mercado aki di realidad virtual. Permiti e gigante di tecnologia cumpra Los Angeles su Within Unlimited segun Federal Trade Commission lo viola e leynan anti-confiansa y ta stroba innovacion, causando dano na e clientenan cu lo enfrenta prijsnan mas halto y menos opcion fuera di e plataformanan controla pa Meta.
Meta Platforms Inc. a bisa den un declaracion fin di diabierna despues cu e declaracion a keda revela cu nan ta “contento” cu e decision cu e hues a tuma. “E trato aki lo trece beneficionan pro-competencia na e ecosistema y lo motiva innovacion cu lo beneficia tanto hende como desaroyadornan y e epsacio di realidad virtual di un manera mas amplio,” e compania basa na Menlo Park, California a bisa. “Nos ta contento pa por cera e transaccion pronto.”
Federal Trade Commission a argumenta cu Meta a laga atras nan propio plan di drenta e mercado di fitness den realidad virtual den ana 2021 ora cu nan a decidí di adkiri Within Unlimited. Sin e menasa competitivo di e gigante su entrada su so, e agencia ta expresa, innovacion ta enkontra un obstaculo cu ta causa daño na e usuarionan.
“E menasa ta loke ta mantene companianan andando,” economista Hal Singer a testigua, ken ta testigo di Federal Trade Commission. “Si mi sa cu tin un chens cu un compania por bin y horta mi clientenan,” el a comenta, e companianan “lo innova y purba mehora nan prijs.”
Sinembargo ehecutivonan di Meta, incluyendo Mark Zuckerberg a bisa cu el a busca manera di calma e nocion cu e compania ta cerca di crea su mesun aplicacion di fitness den realidad virtual. E CEO di Meta a testigua cu aunke e compania tabata “mirando opcion” pa desaroya su propio aplicacion prome cu nan a tuma e decision di adkiri Within Unlimited, e ambiente di e negoshi a cambia y cu “practicamente no tabatin chens” di por cuminsa cu e tipo di proyecto ey.
Bao Zuckerberg, Meta a cuminsa move di manera agresivo den e mercado di realidad virtual cu su adkisicion di e creador di Oculus VR. Desde e tempo aki, Meta su headset a bira parti di e crecemento di e espacio di realidad virtual. Meta a cumpra 7 di e studionan di desaroyo mas exitoso den realidad virtual y awo tin un di e catalognan di contenido di realidad virtual mas grandi mundialmente segun Federal Trade Commission.
