Camara di Comercio y Industria (KvK) a presenta su plannan pe aña nobo ayera den presencia di e directiva nobo bou e presidente nobo Ernst Mohamedy su vice presidente Frans de Mey.

Segun Sr. Mohamed, nan obhetivo principal e aña aki ta pa nan trece e negoshinan y hendenan y gobierno mas hunto. P’esey nan ta yama e aña aki “Bringing Business, Goverment and People together.” Desde e aña pasa nan a cuminsa cu un plan strategico y nan lo sigui purba ehecuta e plan aki e aña aki por medio di diferente comision cu nan tin den e directiva. “Y hunto cu e team excelente cu nos tin aki nan den Kamer van Koophandel, nos ta spera di logra masha hopi punto cu nos kier logra e aña aki.”


Eleccion y hoben
Un otro tema pa nan ta e eleccion politico, enfocando riba esaki den un forma ‘positivo’. Otro puntonan di atencion ta diversifica e economia y traha riba e hobennan “entrepreneur” e aña aki. Nan kier mira unda nan por yuda e hobennan, pero naturalmente e meta mas grandi ta keda di Camara di Comercio pa nan keda e centro di comercio. No solamente na Aruba, pero den e region tambe. Esey ta algun cos cortico segun e president cu Camara di Comercio kier logra.

Miembronan di Camara di Comercio y industria
E aña aki directiva di Camara di Comercio y Industria a haya dos miembro nobo. E ta consisti di e dama Sandy Odor y cu Serge Mansur, Omar Tromp, August Croes y Lionel de Cuba. Na december ultimo Omar Tromp a keda reeligi como vice presidente di e directiva. Randall  Croes y Kawish Baidjnath Misier ta e dos miembro nobo y nan lo forma parti di e directiva pe periodo di tres aña (2017-2019), mientras cu Daphne Agius Cesareo-Lejuez y  Julisa Arends-Hoevertsz a termina nan periodo como miembro di Camara di Comercio.


Logra hopi reto
Aña pasa e director ehecutivo Sonja Velthuizen hunto cu su team a logra hopi reto mes, segun Sr. Mohamed. El a sigui indica, cu aña pasa nan a organisa hopi cos pa comunidad di comercio y e aña aki nan lo sigui haci esaki. “E plan strategico cu nos a bini cu ne aña pasa, nos lo sigui cu ne e aña aki. Nos lo zorg pa nos contribui. Eigenlijk Kamer van Koophandel ta bira no solamente e “business entity” di comercio local, pero tambe internacional.”