(AP) – Facebook y Instagram a fracasa den proteha e usuarionan menor di edad for di exposicion na material di abuso sexual y ta laga adultonan solicita imagen pronografico for di nan, New Mexico su procurador general ta acusa den un demanda despues di un investigacion online.
“Nos investigacion contra Meta su plataformanan di red social a demostra cu nan no ta espacio safe pa muchanan sino lugarnan clave pa predadornan por intercambia pornografia infantil y solicita menornan tin relacion sexual cu nan,” Procurador General Raul Torrez a bisa den un declaracion diaranson.
E demanda civil ta acusa cu Meta ta causa “daño na muchanan y hobennan via nan diseño adictivo di su plataforma, degradando usuarionan su salud mental, nan sentido di balor propio y nan siguridad fisico,” Torrez su oficina a bisa den su declaracion. E acusacionnan aki ta uno similar na un demanda otorga den fin di october pa procuradornan general di 33 estado, incluyendo California y New York contra Meta unda ta acusa cu Instagram y Facebook ta inclui funcionnan cu deliberadamente ta diseña pa atrae muchanan, contribuyendo na e crisis di salud mental di hobennan y cu ta causa depresion, ansiedad y desordennan alimenticio. New Mexico no tabata parti di e demanda aki.
Investigadornan na New Mexico a crea cuentanan falso di muchanan di 14 aña y menos cual Torrez su oficina tabata ricibi imagennan sexual explicito hasta ora cu e ‘mucha’ no tabata expresa interes den nan. Fiscalnan di estado a acusa cu Meta a laga decenas di adulto haya, contacta y encurasha muchanan provee imagennan sexualmente explicito y imagennan pornografico. E cuentanan aki tambe a ricibi recomendacionnan pa drenta gruponan di Facebook cu no tin moderacion y dedica na facilita sexo comercial, segun e investigadornan a informa, agregando cu Meta tambe ta laga su usuarionan haya, comparti y bende “un cantidad enorme di pornografia infantil.”
“Mr. Zuckerberg y otro ehecutivonan di Meta ta altanto di e daño serio cu nan producto ta posee pa usuarionan hoben sinembargo nan a fracasa den haci suficiente cambio na nan plataforma pa preveni e explotacion sexual di muchanan,” Torrez a expresa, acusando Meta su ehecutivonan di duna “prioridad na “uso y ganashi di avisonan riba e siguridad di mayoria di e miembronan vulnerabel di nos sociedad.”
