Den siman Bureau City Inspector (BCI) a ricibi varios melding di luganan cu ta hopi sushi, un problema cu continuamente mester di atencion. A pesar di e esfuerso di e departamentonan concerni, ainda no a logra bin cu un solucion structural pa elimina e problema di sushedad rond di e isla.

Un di e meldignan cu BCI a ricibi tabata trata un cantidad di sushi cu tabatin adelanto edificio di Corte di Aruba. Segun informacion cu nan a publica riba nan pagina di Facebook, adictonan ambulante cu ta frecuenta e area aki tabata trece sushi y laga nan den e parke dilanti di e edificio di Corte den centro di ciudad.

Otro melding a dirigi nan pa San Nicolaas caminda den Jansteenstraat nan a encontra un cantidad di sushi acumula riba un tereno, cual e ploegnan di BCI a recoge y laga e luga completamente limpi.

E problema di sushedad rond di e isla ta keda persisti y un di e motibonan principal pa esaki ta e iresponsabilidad di ciudadanonan cu no ta deshaci di nan desperdicio manera debe ser. Di otro banda otro factor cu ta influi den e problema aki ta cu desde cu dump na Parkietenbos a cera ciudadanonan por deshaci di nan desperdicio na cierto companianan designa, pero esaki tin un costo cune y pa hopi e costo aki no ta accesibel. Na esaki mester agrega tambe cu e costo di containernan di huur pa benta cantidadnan grandi di desperdicio afo tambe ta inaccesible pa hopi.

Pa yuda mitiga e problema, gobierno a bin cu e iniciativa di Baki den Bario, cual a cuminsa desde aña pasa den luna di september y ta tuma luga un biaha pa luna den diferente bario rond di Aruba. E iniciativa aki ta incentiva e ciudadanonan pa separa nan desperdicio y deshaci di esaki di un manera responsabel.

Mañan 31 di augustus e siguiente Baki den Bario ta tuma luga den Hooiberg. Baki den Bario a cuminsa aceptando cinco diferente tipo di desperdicio basa riba e tiponan di desperdicio cu ciudadanonan tabata hiba dump na Parkietenbos mas frecuentemente.

Despues di e prome actividad a tuma decision pa pone baki apart pa taira y carton, a cuminsa acepta azeta di cushina usa y a cambia e orario pa un ora mas prome, for 7or di mainta te cu 11or di mainta.

Mester remarca cu Baki den Bario no ta habri pa desperdicio comercial, solamente desperdicio residencial y no ta acepta asbestos tampoco.

Potret: pagina di Facebook Bureau City Inspector.