Durante e rueda di prensa cu Promer Ministro Evelyn Wever-Croes a tene ayera, el a toca e tema di e negociacion cu Hulanda, y relaciona cu esaki e problemanan den gabinete alrededor di ministro encarga cu Desaroyo Teritorial, Infrastructura y Medio Ambiente, Marisol Lopez Tromp.
Segun e mandatario tin negociacion cu Hulanda tumando lugar continuamente, pero cu e fecha di e reunion di Conseho di Ministro di Reino ta acercando y cu ta birando urgente pa tuma decision como conseho di ministro di Aruba pa loke ta bay presenta na Hulanda.
Sin embargo, segun Promer Ministro “gobierno ta tranca” y den e situacion actual no por tuma decision den Conseho di Ministro, si no resolve e asunto di e conflicto menciona. Pa logra esey ta necesario pa e intermediacion tuma lugar entre su persona y e ministro Lopez Tromp, cu mientras tanto a biaha pa Hulanda y ta bolbe te dia 10 di augustus. Pero, Wever-Croes a duna di conoce durante e rueda di prensa cu e ta prefera di hiba e conversacion ‘en persona’ y no via un medio digital. Mirando cu e reunion di Conseho di Ministro di Reino ta dia 14 di augustus caba, no ta resta mucho tempo pa prepara y tuma e decisionnan na tempo pa por trata nan dia 14 venidero.
Promer ministro a elabora brevemente riba e puntonan clave di e aceptacion di e supervision financiero y e entidad cu lo mester bay supervisa e uso di e prestamo Hulandes y e ehecucion di e reformanan cu Hulanda ta desea mira realisa. El a mustra cierto comprension pa e deseo di Hulanda pa kier sa kico ta haci cu e placa, ya cu un suma di alrededor di 500 miyon florin no ta wega. Di otro banda, e ta haya cu e proposicionnan haci den e landspakket pa Aruba merece debate, pasobra mester analisa si nan ta adecua den e situacion di Aruba. Como ehemplo el a menciona e dolarisacion di nos economia, loke no ta parce algo cu di tur manera ta necesario. Tambe aumenta edad di pension pa 67 aña den tres aña, mientras nos no a ni yega na 65, ta mustra discutible. Tambe e asunto di cumpra accion di empresa estatal pa e entidad supervisor ta algo cu gobierno no ta mira como algo factible. Loke si ta halto riba agenda di gobierno di Aruba ta e posibilidad di refinancia debe, loke por baha gasto di interes riba prestamo drasticamente.
Di tur manera Promer Ministro a enfatisa cu e aña aki lo ta hopi dificil, unda nos no por keda sin haya ayudo. Hulanda ta esun cu por yuda, pero cu a pone condicion. Sin embargo, envez di solamente opone y keda bisa cu esaki ta toca nos autonomia, no ta bay yuda nos. Loke si por yuda ta acepta e ayudo y percura pa nos usa esaki di tal forma cu nos ta sali despues cu un autonomia mas fuerte.
POR no ta haya ministro nobo?
Riba pregunta di prensa encuanto e posible rumbo cu e asunto di e conflicto por tuma, unda a trece dilanti cu lider di fraccion di partido MEP den parlamento a expresa cu si acaso ministro Lopez Tromp mester baha, no ta asina cu partido POR lo haya un ministro nobo pa e cartera ey y cu Promer Ministro lo sigui maneha e cartera ey. Promer Ministro a confirma e ponencia aki y a splica cu e pensamento ta cu mester baha gasto, tumando na cuenta cu mester paga overbruggingstoelage plus salario pa e ministro nobo, y cu por lo tanto e cartera lo keda bao di su encargo te ora yega na un otro solucion.
Sin embargo, den su rueda di prensa diasabra pasa, ministro y lider di partido POR mr. Andin Bikker a reacciona riba pregunta encuanto esaki y a bisa cu esey ta un punto cu lo mester discuti ainda. Aki aparentemente ta surgiendo un punto di discusion entre e partidonan den coalicion, unda ta en berdad dificil pa imagina cu POR lo bay di acuerdo cu un decision asina.
