Mientras cu dificilmente presupuesto di pais Aruba lo wordo trata y aproba den Parlamento, prome cu dia 15 di December manera ley di CAFT ta prescribi, tin otro presupuestonan cu eventualmente lo wordo aproba prome cu aña 2015 caba. Un di nan ta e presupuesto supletorio, asina vice president di Parlamento sr. Chris Dammers a declara na Bon Dia Aruba.
El a laga sa cu e presupuesto supletorio 2015, “esey si mester wordo aproba e aña aki”. Di e forma aki –segun sr. Dammers- bo ta bay responsabilisa cambionan den maneho, cambionan haci den presupuesto 2015 cu ya Parlamento a aproba.
Presupuesto supletorio
E presupuesto aki ta saliendo den corto tempo for di Raad van Advies, y den Parlamento ta hopi cla cu e presupuesto supletorio mester wordo aproba prome cu e aña aki caba.
Vice presidente di Parlamento a laga sa cu e sa di opinion di presidente di e organo legislativo aki, cu ta bisa cu despues di dia 18 lo tin reces. Sinembargo di su banda vice presidente di Parlamento ta considera cu e presupuesto supletorio sigur ta un ley di emergencia. Pues por tin reces, pero mester wak con pa trata e ley di presupuesto supletorio y aprobe ainda prome cu fin di aña.
“Pa loke ta e presupuesto supletorio, mi no ta kere cu nos ta lage pa otro aña. E no por, e mester wordo aproba e aña aki….”, segun vice presidente di Parlamento. E ta argumenta cu e ley aki ta di suma importancia pasobra e ta pa responsabilisa gobierno di tur e gastonan cu a wordo haci den e diferente ministerio. Tambe e cambio di maneho cu a wordo haci dor di gobierno mes. Pues esaki ta un documento cu nos mester aproba e aña aki, segun sr. Dammers.
Otro presupuestonan
Tin otro presupuestonan, entre nan esun di Raad van Advies, Algemene Rekenkamer (Contraloria General) y di Parlamento mes cu nan ta tratando nan den un comision central e siman aki. Despues di esaki lo traha un relato y Gobierno lo contesta e relato aki. E ta kere cu ainda tin espacio pa trata e presupuestonan aki prome cu dia 18 di december ainda.
Pa locual ta tur e otro presupuestonan di TPEF (Tourism Product Enhancement Fund), Presupuesto di Careteranan, Presupuesto di DOW, nan no a drenta na Parlamento ainda tampoco. Nan ta presupuestonan cu pa vice presidente di Parlamento, nan lo por trata na januari venidero.
E ta considera esun di urgencia ta e presupuesto supletorio, ya cu na su parecer, e mester wordo aproba e aña aki.
