E siman aki lo tin diferente reunion interno den parlamento prome cu e miembronan di e institucion  ta bay den reces otro siman.  Presidente di Parlamento, Mervin Wyatt-Ras ta declara na Bon Dia  Aruba cu esaki ta e ultimo siman cu nan lo tin reunion di parlamento ya cu otro siman nan lo cuminsa cu reces te mita di augustus awor.  

E ta laga sa cu aunke nan ta bay den receso esaki kiermen cu e reunionnan no ta tuma luga den parlamento; sinembargo e parlamentarionan ta keda haci nan trabou. Tambe mester tene na cuenta cu ya caba nos ta den temporada di campaña prome cu eleccion di dia 22 di september awor. Seguramente e parlamentarionan lo bay uzo di e temporada di reces aki pa bay den campaña den diferente bario rond di nos isla. E ta spera cu ora e parlamento ta habri bek e organo legislativo por conta cu presencia di tur miembro pa sigui trata leynan pendiente.

Defensor di pueblo
Un ley cu nos a puntra presidente di parlamento con a para cu ne ta esun di defensor di pueblo of  Ombudsman, cu pueblo ta sclamando basta tempo pa e bin pronto. Sra. Wyatt-Ras ta bisa cu esaki ta un ley cu nan tur como miembro di parlamento tabata parti di dje. “Nos tabata den e comision cu a prepara e ley aki.” E ta splica cu na momento cu nan a bay trata e ley aki den e comision nan a constata cu mester cambio teniendo na cuenta cu nos constitucion pa asina e ley aki por tin su efecto y traha manera mester ta. Actualmente e ley aki ta den e veld di gobierno y parlamento ta pendiente ainda riba e contesta di gobierno. “Cu gana nos kier pasa e ley aki”, e ta bisa.

Mirando cu ta rekeri di un cambio den nos constitucion e ta deduci cu kisas gobierno no kier bin cu e cambionan aki asina rapido ya cu nan tin cu pens’e ya cu un cambio constitucional ta algo grandi ya cu e ta e weso di lomba di nos estado di derecho. Pero -segun sra. Wyatt-Ras- nan ta na spera di e ley ta practicamente ‘OV-klaar’ pa nan trata den reunion di parlamento. Manera Bon Dia Aruba a publica, e ley ya ta un aña cla caba pa warda riba tratamento. Y tur fraccion den parlamento ta sostene e ley aki. Parlamentario Marisol Lopez Tromp a manda un carta awor pa urgi e presidente di parlamento pa pone un fecha pa tratamento prome cu eleccion.

Leynan pendiente
Nan tin leynan pendiente ainda pa trata nan den reunion publico, entre nan esun di ortografia oficial di Papiamento; pero ainda ta falta cu e contestanan por drenta. E ta spera cu unabes cu nan ta haya e nota di contesta por  debati y aproba e leynan aki den reunion publico.

Otro ley pendiente ta esun di ‘functiehuis’ y structura di salario di cuerpo di Duana. Ya caba Parlamento a haya e diferente rekisitonan, sinembargo ainda tin discusion andando. P’esey ainda parlamento no por a programa e reunion aki, pero e ta kere cu despues di e reces lo tin ‘amplio oportunidad pa haci esaki’. Otro asunto cu nan ta ta esun di e codigo di conducta cu -segun presidente di Parlamento – ainda nan ta tratando den nan reunionnan.

Cinco ley aproba
Siman pasa nan tabata basta activo cu e aprobacion di cinco ley. E ta lamenta cu practicamente hopi miembro practicamente a bay den reces caba; ya cu nan no ta bay atende e reunionnan. E ta destaca si e trabou intensivo cu a wordo haci pa asina trata y aproba e leynan aki, entre nan: aumenta e suma di pension y rebaho riba fiansa di studio. Tambe empleadonan di Setar ta haya un suma cu nan tabata bringando for di 14 aña pasa, ora cu e compania aki a cambia di status. Igualmente nan a aproba un ley den cuadro di combatimento di labado di placa y terorismo. Tambe un ley cu ta bira un estimulo fiscal pa esun cu ta cumpra un edificio monumental pa medio di rebaho riba pago di impuesto