Prome Minister demisionario, Mike Eman ta aclaria cu no ta cuestion cu nan ta tumando mas hende na servicio di gobierno y/of pushando nan papel den departamento di Recurso Humano (DRH), specialmente awor cu lo bin un gobierno di coalicion nobo pa maneha nos pais.
“Tur loke a tuma luga prome cu eleccion for di januari pa september 2017 ta cay den e periodo normal di gobernacion. Esey mi ta kere cu niun hende ta duda di nan legitimidad”, el a bisa. Mayoria ta relaciona cu persona cu ya caba tabata den servicio di gobierno. Entre otro e por ta asina cu nan ta wordo translada pa un departamento pasobra nan no ta trahando mas na besturskantoor cerca e mandatarionan.
E mandatario ta indica cu tur documento cu ta wordo trata den conseho di minister for di eleccion ta decisionnan cu ta wordo basa na loke nan ta yama xxxxxx. Kiermen casonan cu ta canando y pa cual nan a tuma decision ariba nan.
Encuanto e supuesto decision di DRH pa tene varios contracto wanta prome cu eleccion of prome cu e gobierno a bira demisionario, e ta un preocupacion cu e ta scuchando hopi rond, segun e mandatario. Pero sr. Eman a laga sa cu e no a wak e documentonan aki mes pa e por bay specificamente duna un declaracion di dje.
Sinembargo e ta considera importante pa tene na cuenta cierto aspecto ora bo ta papia di salario di hende y tambe riba continuidad di trabou di hendenan den gobierno. E ta kere cu ta importante pa nos keda hopi cauteloso pa no hinca politica partidista den esaki pa medio di un gobierno nobo cu ta bay sinta proximamente.
E ta spera cu e preocupacion cu por existi rond di un gobierno nobo cu lo bay sinta tocante hendenan cu tin añanan trahando den gobernacion lo wordo perhudica perdiendo nan trabou den gobierno. E ta spera cu esaki no lo bira un echo. Aunke nan a mira cu esey a yega di sosode den pasado.
“Mi coleganan por ta testigo cu durante e periodo cu nos a drenta den gobernacion como prome minister semper mi a accentua cu nos mester ta hopi cuidadoso pa no toca entrada di hendenan”, el a bisa. Esaki a pesar cu nan a wordo nombra durante e periodo di un gobernacion anterior.
P’esey e ta haya cu mester ta cauteloso riba e asunto aki pasobra na final di dia, tata y mama di famia nan ta, y nan merece un entrada y un trabou. E ta kere cu esaki mester ta un punto cu nan mester tene separa di pensamento politico.
