Semper cu presenta un caso grandi, unda tin politico envolvi, nos ta cuminza tende e comentarionan cu Ministerio Publico mester ta bao influencia di e gobierno di turno, cu e ministro di husticia di turno lo mester ta dirigi OM como si fuera un departamento ordinario, etc. Nos por djis ignora e tipo di comentario ey, splica nan pa nos mes como aberacion di tal o cual color politico cu no a keda contento cu un politico di nan partido preferi a bira e supuesto ‘victima’ di un husticia cu ta actua inhusto semper, pasobra cu cualkier color politico na mando, semper tin hende cu aparentemente ta haya cu Ministerio Publico mester actua solamente den e casonan cu ta conveni nan preferencia politico. Ta parce cu ta dificil pa un parti di nos ciudadanonan bisa “laga husticia haci su trabao”, irespecto di ken ta e persona involucra. Al contrario, na un momento asina ta parce cu Aruba, sin red social ni Facebook, pa hopi aña caba ta e cuna di ‘teoria di conspiracion’.Lastima cu nos no por a bend’e como idea comercial, e por a yuda corta nos debe nacional cu hopi miyon, nos ideanan di innovacion no a logra yega ey…

Pero den serio, nos ta nenga di kere cu e institucion special aki ta consisti di hende cu ta traha completamente a base di nan gusto personal y di e dia particular ey, y cu ademas ta cana na man di e mandatario di turno, o peor ainda, di un cu no ta ministro mas, pero supuestamente tin su lineanan ta core ey den ainda. Tur lugar unda tin hende ta traha, sa comete eror, sa tin hende cu ta traha na un manera no integro, esey nos por tuma como un hecho. Pregunta ta semper, con bon e organisacion o departamento ey ta arma contra e peligronan aki. Anto, envez di practica teoria di conspiracion lo ta mas util pa puntra nos mes con bon e organisacion particular ta structura pa evita e tipo di corupcion ey. Un pregunta dificil pa nos contesta, pasobra nos no tin un vista den e institucion pa nos por evalua esey. Lamentablemente esey ta e caso tambe pa mayoria di e departamento y institucionnan gubernamental o semi-gubernamental. Nos por culpa nan pa esey? No, ki dia a yega di exigi di nan cu ta percura pa e ‘checks and balances’ interno cu nan lo mester tin? Ki dia nos a yega di puntra cualkier ministerio o departamento con nan ta ‘screen’ nan personal? Con por ta cu regularmente sa pasa cu tin hende ta traha den despacho di un ministro, no cu diploma, sino cu strafblad?

Tabatin un tempo cu e departamento y ministerionan tabata tene nan mes estrictamente na e regla cu bo no por tin famia cercano trahando hunto den mesun departamento. Unda e reglanan ey a keda? Probablemente riba un bon, o mal dia, un mandatario a puntra: “Unda ta skirbi cu mi no por hinca ruman, primo, sobrina, den mi despacho o den cualkier departamento di mi gusto?” Un funcionario serio y recto den su trabao ta risca su carera contestando: “Excelencia, esey ta loke na Hulandes nan ta yama ‘ongeschreven regels’, nan no mester ta skirbi den piedra, pero nan ta make sense.” E contesta, talvez no elocuente pero si eficaz di e mandatario tabata “Si mi no ta mir’e skirbi den ley ta pasobra mi mag hacie.” Fin di e discusion. Y tanto aña despues, ata nos cu e consecuencia di a ‘habri man laga bay’. Di a keda keto mientras esnan den poder, no tur, a organisa nan administracion segun nan deseo. Un eror grave di nos, pasobra nunca e mester a bira ‘nan administracion’ sino cu e mester a keda ‘di nos’ cu regla cu nos a pone y nan mester cumpli. Nos ta biba den un pais unda poder politico a ‘hijack’ gobernacion y ta goberna segun nan ta haya ta bon.

A proposito, nos por a mira durante e ultimo periodo presidencial na Merca con un presidente a hinca henter su famia den su despacho, mientras cu henter un nacion a para wak esaki sucede. Casi mitar di e pais tabata di acuerdo cu e mandatario ey a pone un punto final na practica di e reglanan ey contra nepotismo. “Waar staat het geschreven,” Donald Trump lo a bisa si e tabata papia Hulandes. Cu esaki nos kier ilustra cu no ta cosnan cu ta pasa solamente cerca nos, sino cu e ta parti di un deterioro grandi global di norma y valor encuanto bon administracion publico.

Tur esaki ta haci cu, banda di e speculacionnan si Ministerio Publico ta actua segun afiliacion partidario o algo por el estilo, nos ta beneficia mas si nos ta cuminza exigi cu nos ta bolbe na un cuadro drechi di control general den gobierno, y si ta necesario e biaha aki si skirbi tur cos den piedra. Esey no lo preveni tur maldad, pasobra maldad ta maldad pasobra semper e ta busca un caminda pa pasa toch, pero en todo caso por limita e daño mas tanto posible. Nos ta mira e partidonan politico actual capaz di haci e trabao gigantesco di mehoracion aki riba nan mes? Nos por duna nan otro 35 aña pa proba…kico?