E situacion na Venezuela ta bayendo den un direccion basta preocupante. No solamente pa e Venezolanonan mes cu ta biba den nan pais; y esunnan cu ta biba den exterior; sino tambe pa e paisnan bisiña manera Aruba cu tin lasonan masha estrecho cu Venezuela.
Tin hendenan cu ta haya cu e marchanan cu a cuminsa mas cu dos siman pasa, ora cu e Tribunal Supremo di Husticia a purba cera of anula Asamblea Nacional, no tin “marcha atras”. Te hasta e lider di oposicion Henrique Capriles Radonski a laga sa -durante un entrevista publica pa e corant El Nacional di Venezuela ayera- cu: “Venezuela ya ha entrado en una etapa de desenlace”. E ta considera cu e unico dialogo existente cu e gobierno Chavista ta pa medio di un eleccion.
Ola di protesta
Pueblo Venezolano no a acepta cu Tribunal Supremo di Husticia kier a anula e poder legislativo -cu ta un di e tres poder den un estado democratico- y cada bes mas e ola di protesta riba caya ta hayando mas forsa. Ayera e simpatisantenan di oposicion a decreta un Gran Plantón Nacional.
E periodista Tibisay Romero no ta sigura cu esaki lo ta e delaster drop cu ta basha over e beker di pasenshi y tolerancia di e pueblo Venezolano. “Si nan ta logr’e, mi no sa!”.
Pero si a base di su experiencia como periodista, e ta percibi cu e hendenan ta mas dicidido pa subi caya, a pesar di e represion di gobierno. Tambe e ta haya cu Venezuela su hendenan a siña cu e cambionan cu nan kier ta denter di un cuadro constitucional y democratico. “Pero e hendenan a siña tambe di tin un tiki di pasenshi pa nan sa cu eventualmente e cambionan aki no ta di awe pa mañan.”
Un refleho cu e pueblo su buchi a yena ta e imagen conmovedor di un hende homber flaco y totalmente sunu cu a subi riba un tanki militar. Pero di otro banda e indignacion nacional y internacional cu a causa presidente Nicolas Maduro, ora cu el a haci bofon y burla di un situacion asina tristo. Sr. Tibisay ta haya cu un tipo di reaccion asina ta crea mas distancia pa por logra un acercamento of acuerdo entre gobierno y oposicion. Actualmente den casi henter Venezuela ta wordo expresa un cambio, ya cu e modelo socialista-comunista no ta factibel. E echo cu e gobierno Chavista a expropia varios empresa sin paga nan. Tambe e echo di introduci un control di cambio di divisa a produci un impacto economico cu a ocasiona cu e productividad a cay; y esaki a trece un gran escasez cu ne den un pais rico manera Venezuela.
Presion popular y eleccion
Nan ta buscado cu e biaha aki si e presion popular por logra cu sr. Maduro ta convoca eleccion presidencial e aña aki. Sinembargo diadomingo ultimo presidente di Venezuela a expresa cu e kier “eleccion ya”, pero eleccion regional di Alcalde y Gobernador pa purba di baha e tension den henter Venezuela. E eleccion regional aki mester a tuma luga na december ultimo, locual te aworaki cinco luna despues ainda no a sosode. E ola di protesta di oposicion ta exigi un salida democratico pa medio di un eleccion presidencial transparente, considerando cu sr. Maduro su popularidad ta masha abou mes. Pero di otro banda nan tin duda riba Conseho Nacional Electoral (CNE), p’esey oposicion ta exigi garantia pa celebra un eleccion transparente.
Di otro banda –segun e periodista- no mester lubida cu aña pasa ora cu un protesta a cuminsa haya forsa, Vaticano a bin cu e proposicion di instala un mesa di dialogo. E biaha aya e mesun solicitud expresa den e mesa di dialogo ta e mesun solicitud cu oposicion Venezolano ta exigi aworaki.
Nan ta exigi pa convoca eleccion general na 2017; liberacion di e presonan politico; acepta e ayudo humanitario internacional y eligi miembronan nobo y imparcial den Conseho Nacional Electoral (CNE) y Tribunal Supremo di Husticia. E proposicion cu Papa Francisco pa busca un salida pacifico na e crisis di Venezuela no a duna fruta, sino mas bien a baha e presion di e hendenan cu tabata protestando riba caya.
“Locual a haci ta baha e animo di e hendenan; y tambe a ocasiona malestar cerca algun sector politico di oposicion. Nan a sinti cu e mesa di dialogo no a logra niun avance”, e periodista ta refleha.
E gobierno di Nicolas Maduro a descarta e posibilidad pa celebra un eleccion presidencial adelanta e aña aki, ya cu supuestamente e mester tuma luga na 2018. Pero tambe mirando e magnitud cu e protesta aki ta bin creciendo for di 1 di april ultimo; ya nan a cuminsa propone pa instala otro mesa di dialogo cu e grupo di oposicion y participacion di ex presidentenan Latino Americano.
Salida pacifico
Tibisay Romero ta haya cu e polarisacion cu tabata existi antes entre e “pueblo Chavista” y “e pueblo no Chavista”, no ta mas. “Mi ta kere cu e gran mayoria di e pueblo Venezolano ta sinti e peliger di no sa kico nan ta bay come mañan. Tambe nan ta sufri e susto di no bira malo, pasobra nan no sa kico ta bay pasa cu nan. Si bo ta mira malo y bo no ta haya e remedinan te hasta bo ta core e risico di muri.”
E no ta premira cuanto mas e situacion aki ta bay dura y menos na ki prijs. Ayera durante e entrevista aki el a informa cu e represion di gobierno ehecuta door di forsa publico y algun hendenan arma pa e mesun gobierno yama “colectivo”, a purba di intimida e hendenan cu ta participa den e “platón” como un forma di resistencia pacifico. “Tin brote di violencia cu ora nos ta cubri nan como periodista, nos por mira cu ta hendenan jong.”
Sr. Tibisay ta un periodista gradua 25 aña pasa di cual e ultimo 18 añanan e ta informa riba e desaroyo y consecuencia di e gobierno Chavista na Venezuela. Actualmente e ta traha cu e cadena radial Union Radio y tambe cu e website: www.elestimulo.com E ta considera cu aunke e Chavismo a cuminsa cu bon intencion na fabor di e clase mas humilde, pero corupcion a bira mas grandi cu nan intencion. E ta kere particularmente -a base di su experiencia periodistico- cu gobierno y oposicion por yega na un acuerdo y evita un confrontacion di un magnitud mas grandi na Venezuela, pero mester crea un ambiente di entendimento. “Pero entendimento real!”
El a denuncia cu durante e ultimo dianan a yega di sosode “cosnan mas delicado ainda”, caminda periodistanan y trahadonan di medionan di comunicacion a bira victimanan di atake y represion. Varios periodista a keda deteni y interoga pa organismo di siguridad y inteligencia policial, simplemente pasobra nan tabata realisando nan trabou di divulga informacion.
Na final sr. Tibisay ta bisa no solamente como Venezolano sino como un persona creyente den Dios cu e situacion actual na Venezuela lo por haya un salida mas pacifico y democratico posibel. E posibilidad t’ey, ya cu e mesun Constitucion traha pa e Chavismo ta establece cu nan por haci uzo di un eleccion revocatorio y/of bin cu un convocatorio di eleccion anticipa, ya cu principalmente mester puntra e pueblo Venezolano: Kico boso nan kier? Boso nan kier pa e gobierno aki sigui of no?
