(NewYorkTimes) – Ley nobo den varios estado na Merca ta permiti mucha y adolescente declara un dia liber pa salud mental. Esaki ta un bon tendencia? Lo ta deseabel pa trece e opcion aki na nos scolnan?

Varios estado, incluyendo Arizona, Oregon y Virginia, recientemente a pasa legislacion cu ta permiti studiantenan keda sin bay scol pa cuida nan salud mental, esfuersonan cu hopi biaha tabata sosteni of lidera pa studiantenan.

Den ‘Adolescentenan ta bogando pa dianan off di scol pa salud mental’, Christina Caron ta skirbi:
Pa ora Ben Ballman a yega na su penultimo aña di scol secundario e tabata mas druk – y mas ansioso – cu loke el a yega di sinti. “Mi tabatin momentonan cu mi tabata sinti henter mundo tabata cay riba mi”, el a bisa. “Tabata definitivamente un tempo hopi dificil.”

Prome cu e pandemia a shut down tur cos, su dia tabata cuminsa pa 6:30am, ora cu e tabata lanta pa cuminsa prepara pa bay scol. Despues tabatin varios curso Avansa; despues sea training di futbol of su trabao na un clinica di mata; studia pa SAT (landsexamen na Merca); y varios actividad extracuricular. Hopi biaha e no tabata cuminsa su huiswerk sino te 11pm, y finalmente tabata bay drumi varios ora despues. Tur dia e mesun schedule pisa.

“No ta ni cu mi tabata haciendo di mas, tabata, ‘esaki ta lo minimo’”, segun Ben, awo di 18 aña di edad y recien gradua di Winston Churchill High School na Montgomery County, Md. “Ta como un pressure cooker cu ta cera. No tin niun caminda pa scapa. Eventualmente bo ta djis rementa na dado momento, of cu speransa, bo por surpas’e.”

E articulo ta continua:
Enfrentando nivelnan halto di stress entre adolescentenan y un crisis di salud mental cu ta inclui tasanan di suicidio empeorando, algun estado [na Merca] awo ta permiti studiantenan declara un dia pa salud mental.

Den apenas ultimo dos aña, Arizona, Colorado, Connecticut, Illinois, Maine, Nevada, Oregon y Virginia a pasa legislacion permitiendo muchanan keda sin bay scol pa motibonan di salud mental of di comportamento, esfuersonan cu hopi biaha a conta cu ayudo of liderazgo di e studiantenan mes.
Y na maart, Utah a dicidi cu un ‘excuus valido’ pa ausencia di un studiante awo ta bay inclui ‘salud mental of di comportamento’, ampliando un definicion anterior cu tabata haci referencia na salud mental.
E legislador cu a sponsor e legislacion, representante Mike Winder, un Republicano, a bisa e canal di television KUTV na februari cu tabata su yiu muhe, e tempo aya un studiante di ultimo aña na Universidad di Southern Utah, cu a sugeri e idea.

Fin di aña pasa, e grupo Mental Health America a encuesta adolescentenan riba e top tres cos cu miho por yuda nan salud mental. Mas di mita di e studiantenan a cita e habilidad pa tuma un break pa salud mental of ausencia di sea scol of trabao. Y den un Harris Poll di mas di 1m500 adolescente cu a tuma luga na mei di aña pasa, 78 porciento di encuestadonan a bisa cu scol mester sostene dianan di salud mental pa permiti studiantenan duna prioridad na nan salud.

Ben, e recien graduado, a bisa cu como studiante di scol secundario el a papia cu su compañeronan di klas cu tabata den problema y tabatin mester di sosten, pero no tabata sa unda pa bay. Pues el a organisa un coalicion di studiante pa mehora servicio di salud mental pa studiantenan den su estado. E aña aki el a pasa varios luna sosteniendo un legislacion pa salud mental na Maryland, pero cu a keda para den Senado Estatal.

E articulo tambe ta comparti algun motibo pakico dianan di salud mental por no bira un realidad na mas scol, al menos te awo:
Den sistema di scol di Ciudad di New York, cu tin mas di 1 miyon studiante, un dia off pa motibo di salud mental of di comportamento ‘lo wordo trata como cualkier otro dia malo’, Nathaniel Styer, un vocero di Departamento di Educacion di Ciudad di New York, a bisa.

E frase ‘dia di salud mental’ por haci algun mucha y mayor sinti incomodo. Cu esey den mente, e hunta escolar na Montgomery County, Md., a dicidi cu ta bay excuus ausencianan tuma pa ‘malesa y bienestar di studiante’ cuminsando e aña escolar nobo.

“Nos no tabata kier yam’e un ‘dia di salud mental’ pasobra nos sa cu ainda tin stigma rond di esey”, segun Karla Silvestre, vice presidente di e hunta escolar, a bisa Education Week na juni. Scolnan tambe ta experimentando cu otro metodo mas leu cu dianan di salud mental pa yuda studiantenan anda cu e stress diario. E Jordan School District na South Jordan, Utah, ta usando ‘cambernan di bienestar’ unda studiantenan por relaha pa dies minuut si nan ta sinti abruma. Y algun scol na Colorado a crea ‘camber oasis’, un sala di studiante cu conseheronan y otro recurso.