Recientemente Refineria di Aruba NV y e empresa Mericano Eagle LNG a cera un acuerdo pa entrega di gas natural den forma liquido (Liquified Natural Gas; LNG) pa uso den e refineria y otro, manera pa genera electricidad na WEB. Tambe e gas aki lo por ta disponible pa usa pa vehiculo, unda por pensa riba transporte pisa manera bus y truck, mientras cu en principio uso den auto priva tambe ta posible. Na Europa desde hopi aña caba ta usa gas (Liquified Petroleum Gas; LPG) pa transporte, tambe pa vehiculo di uso personal.

Tambe ta importante pa tuma na cuenta cu den ultimo añanan a bin mas exploracion con pa usa LNG den paisnan cu no tin un consumo grandi di LNG, unda den e añanan anterior e transporte y almacenahe di LNG tabata asina costoso, cu mester tabatin un mercado di un cierto volumen pa hustifica un punto di distribucion. Asina, den e esfuerzo di trece LNG pa Aruba durante gobierno anterior tabata argumenta cu e volumen cu Aruba lo por a maneha, tabata depende pa tres cuarto parti di e refineria, cu WEB consumiendo solamente e otro cuarto parti. Tambe tabata considera e opcion di un tubo bao di lama, pa trece gas natural for di Venezuela. Nunca a yega asina leu, pa e fracaso di e proyecto di refineria pa otro motibo, y cu esey e idea di trece gas natural na Aruba tambe a muri un morto prematuro.

Nos ta den un situacion nobo awor, unda atrobe tin un proyecto cu ta similar, den e sentido cu ta papia di un banda di rehabilita e refineria, y di otro banda di explora e posibilidadnan di uso di LNG na e isla. Lo ta bon pa e biaha aki si considera e dos proyectonan como posiblemente complementario, pero, caso dado, tambe separa. E motibo pa esaki ta cu mester investiga e posible utilidad di LNG na Aruba, ya cu no ta sigur cu e proyecto di refineria ta bay logra. Nos no mester bay den tur detaye aki pa argumenta esey, pero di e reaccionnan cu tabatin despues di e anuncio di e proyecto di rehabilitacion, por saca afor cu hopi hende ta bastante critico, y cu nan razon, encuanto e perspectivanan pa renoba y opera un refineria na Aruba. E situacion internacional cu ta marca pauta pa un recuperacion di e industria aki ta bastante scur. Na e momento aki produccion y consumo mundial di petroleo a cay cu 20%, producto di e crisis di Covid-19, y entidadnan internacional manera International Energy Agency (IEA) ta pensa cu no solamente lo tarda hopi pa e situacion mundial economico drecha, pero cu e reorientacion di uso di energia den direccion di mas energia renovable, por tin como consecuencia cu petroleo talvez no ta bay bolbe mas na e nivel pre-Covid. Practicamente tur e ‘major players’ den petroleo a cuminza reorienta nan inversionnan den direccion di energia renovable. Na tur parti di mundo tin refineria paralisa, y hasta e companianan grandi di e sector ta eliminando parti di nan capacidad di refinacion.

E tendencia aki no ta implica cu petroleo no lo hunga un papel mas den mundo di energia y di petroquimica. Pa hopi decada ainda sigur petroleo ta bay tin su presencia, pero desde promer cu Covid ya caba tabatin un sobrecapacidad di refinacion mundial, unda nos region tampoco no a scapa di esaki. E refinerianan na Aruba, Curaçao, St Croix y Trinidad & Tobago tabata para caba ora Covid a cay aden. Hunto cu e caida grandi di produccion y refinacion na Venezuela por papia di mas di dos miyon bari pa dia di capacidad di procesamento cu no tabat’ey mas y mundo no a haya nan falta. Un cos ta pa propone un proyecto y otro ta pa logra implementa. Pa e motibo aki lo ta bon si por incorpora un analisis den e proyecto actual, unda ta contempla e posibilidadnan di uso di gas natural, separa di e refineria.

Nos no mester ripiti e eror cu a comete algun aña atras, cu ora e refineria a fracasa, no a sigui explora con pa haci e cambio toch pa libra nos di e uso di fuel oil pa genera coriente. Ademas ta bin un argumento practico acerca: si no tin refineria , loke pa nos ta mustra – atrobe – e rumbo den cual nos ta bay, e fuel oil cu ta usa, manera ta e caso actualmente desde 2012, mester bin di exterior. Como pais nos no ta perde nada si nos cambia pa gas natural, cu tambe mester importa pero cu probablemente lo sali mas barata, plus e bentaha di un combustible, keto bay fosil, pero cu ta duna menos emision dañino. Si acaso esaki lo bira e forma con nos lo haci uso di gas natural, naturalmente mester considera e ubicacion di e instalacion unda ta trece e gas aden. San Nicolas no necesariamente lo mester ta e lugar ey, ya cu mester bay core tuberia di gas bao presion halto pasa den tur e barionan te yega Balashi. Den añanan 60 di siglo pasa a pasa tuberia den tur e lugarnan sin puntra niun hende nada; awendia lo ta imposible pa haci esaki sin mas. Suficiente material pa pensa y discuti.