– E topico di e hobennan problematico, specialmente esunnan cu a cay den man di husticia, a domina e debate di tratamento di presupuesto 2017 di ministerio di Husticia den Parlamento, diamars ultimo.
Considerando e situacion delicado aki, ya cu generacion nobo ta futuro di nos pais, Bon Dia Aruba a acerca minister Arthur Dowers di Husticia riba e tema aki kende a bisa cu no ta asina cu e topico aki a prevalece riba e debate rond di criminalidad. “Loke a sosode ta cu nos a pone riba agenda pasobra nos ta mira cu e hobennan ta hungando un rol importante pa loke ta criminalidad den nos pais”, el a bisa.
El a splica cu na momento cu e no a sigui mas como minister di Enseñansa y Asunto Social den gabinete Mike Eman II, el a percura pa e maneho integral aki keda cla. Ademas e maneho aki tog a wordo tuma over y actualmente e ta den implementacion. Banda di esey e ta haya cu mester bin mas atencion di parti di departamentonan Social, Enseñansa y Salubridad Publico pa loke ta trata desaroyo di e hobennan aki. Ya cu ora e problema ta yega cerca ministerio di Husticia “ya caba e ta laat”, segun e mandatario.
Pa loke ta trata e parti di proteccion di e hobennan aki e ta reconoce cu e ta un tarea cu ta cay den su ministerio. Pero ora cu ta trata di un cliente den man di Reclassering, ya caba e mucha ta envolvi den crimen. E ta haya cu mester preveni cu nos hobennan cay den gara di criminalidad of di e persona cu ta uz’e como instrumento pa comete acto contra ley como droga.
“E ta un lucha hopi largo cu nos tin cu hiba. Mi ta kere cu e ta un lucha cu ta bal la pena pa bo hib’e. Pasobra si bo no ta hacie, bo ta haya e situacion cu nos tin aworaki”, segun e mandatario. Di otro banda, encuanto e menasanan contra nos siguridad cu ta bin di afo, e mandatario a indica cu nan ta trahando “hopi duro contra nan”. Pero tambe nos tin un menasa hopi grandi di paden y nos mester confronta nan di paden tambe. E manera cu e ta haya mas ideal pa confronta e menasa aki ta pa medio di cera cabes hunto.
Maneho integral
E mandatario a indica cu e problematica aki ta uno cu si bo no ta atende di un forma apropia bo ta bay tin un grupo grandi di hende cu ta bay tin un carera hopi largo pa loke ta trata criminalidad. E ta un situacion preocupante cu ta data for di hopi aña pasa. Minister Dowers a indica cu ya caba den tur e rapportnan for di 2005 te cu 2007 ta wordo papia di e situacion preocupante relaciona cu criminalidad hubenil. Pero tambe cu masha poco a wordo haci di parti di e partido cu tabata na mando e tempo aya y cu awendia como oposicion ta atake riba asunto di criminalidad.
Minister Dowers a bisa cu su ministerio ta hibando un maneho mas integral pa atende cu e situacion di nos hobennan problematico cu ta integra e parti di enseñansa cu husticia. El a percura pa bin cu un introduccion di Leerwerk traject, ya cu e ta haya cu e proyecto aki ta uno hopi importante pa haya contesta riba e preocupacion cu tin rond di nos hubentud. “Banda di esey nos a percura pa traha ariba maneho integral”.
Segun e mandatario, nan tin tur e documentonan, infrastructura, plataforma profesional cu e ta haya cu ta funcionando bon. El a menciona cu e Ortho Pedadogisch Centrum ta cla y cu nan ta traha estrechamente cu ministerio di Enseñansa caminda nan ta wak pa bin cu algun test pa nos muchanan. Pues minister Dowers ta haya cu nan tin tur instrumento necesario y na cantidad. Pero a yega e momento pa cuminsa ehecuta nan.
Tambe el a haci un apelacion cerca e mayornan cu tin e responsabilidad directo pa lanta un mucha drechi; ya cu nos tur como mayor mester carga e responsabilidad aki. E sa cu tin mayornan cu ta haci esfuerso hopi grandi “y nan ta bin cerca nos y nos ta yuda caminda cu por”, el a bisa. Pero tambe –segun e mandatario- tin mayornan cu no ta consciente di e riesgonan cu nan yiunan ta core y akinan e instancia gubernamental ta hunga un rol pa yuda nan cu informacion, datonan y conocemento riba e peligernan cu nan yiunan ta core.
