Variante Delta ta un di e variantenan di Covid-19 cu ta plamando hopi lihe rond di mundo, na unda cu Organisacion Mundial di Salud (WHO) a indica cu el a extende den por lo menos 100 pais desde cu a wordo identifica aña pasa pa prome biaha na India.

Segun estudio- y declaracionnan di expertonan den area di salud, esaki ta un version di Covid-19 pero mas peligroso y mas infeccioso, cu pa aumento di casonan y e menasa di e variante aki, varios pais a implementa back e medidanan di bioseguridad.

E variante aki, cu ta esun cu tin mayor prevalencia entre hobennan segun WHO, ta hunga un rol activo den epoca aki di pandemia, na unda hobennan no tabatin riesgonan grandi cu e variantenan anterior. Sinembargo, cu variante Delta tin mas contagio, hospitalisacion y tambe uso di mashin pa hala rosea.

Ta existi gruponan den comunidad cu te ainda ta resisti pa haya vacuna, na unda por a destaca cu den ultimo rapport di Departamento di Salud Publico di Aruba (DVG), di diabierna 16 di juli, a reporta 41 caso positivo den un siman. Bon Dia Aruba a tuma contacto cu DVG pa asina haya informacion si den e cifra aki tin personanan cu no a wordo vacuna y e edad di nan, pero nos reportero no por a haya un contesta.

Ta keda destaca cu esun cu no a wordo vacuna ainda ta esunnan cu ta haya e virus di un manera mas fuerte y nan por caba interna den hospital, y den algun casonan hasta por fayece.

Den e grupo aki, ta considera cu tin riesgo mayor y ta pa motibo cu no tin e vacuna ainda of tambe pa cierto comportacion cu por wordo considera como iresponsabel – manera reuni cu amigonan, sali bay fiesta, entre otro.

Por sucede cu pa via di e grupo specifico aki e poblacion ta core e riesgo di no por haya un inmunisacion pa por elimina e virus y protege e isla.

Na Merca, actualmente e variante Delta constitui 51,7% di infeccionnan nobo, mientras cu variante Alfa, cu a domina pa basta lunanan, awor ta representa e 28,7% di e casonan.

“E principal desbentaha ta cu por provoca un transmision por lo menos dos biaha mas lihe compara cu e virus original y esey kiermen cu si algun persona ta infecta, probablemente lo tin un carga viral mayor y un facilidad mayor pa contagia otro hendenan”, segun loke experto cientifico di WHO, Soumya Swaminthan a afirma.

Si bien tambe ta importante pa destaca cu vacunanan a demostra di ta efectivo contra variante Delta pa preveni cu e persona infecta lo por desaroya un malesa grave, ta reduci cu e por bay na hospital y fayece door di e malesa aki. Pero esaki no ta evita cu personanan por contagia di Covid-19.

Ta p’esey ta recomenda pa sigui usa tapaboca, sigui mantene distancia, evita aglomeracion y si ta sinti algun sintoma keda cas, yama dokter y no sali te ora por haci un prueba, pa motibo cu vacunacion so no ta e unico arma pa combati e virus.

Manera a keda conoci algun dia pasa, Aruba a trece dilanti un biaha mas e maneho na frontera, na unda cu tur persona, sea residente di Aruba of no, mester presenta un test negativo pa Covid-19. Tambe por haci e test na aeropuerto ora di yega na e isla. Ta depende di e resultado di e test si e persona por sigui cu su actividadnan of ta drenta den isolacion. Esaki ta pa motibo di e variante aki, pa asina salvaguardia e salud di e comunidad di Aruba y di su economia.

Na momentonan aki, variante Delta ta esun cu a extende mas na teritorio Europeo, tanto asina cu European Medicines Agency (EMA) a alerta cu pa final di luna di augustus, e variante aki por tin e 90% di e contagio na rond di mundo.

Comunidad mester keda alerta y aunke tin flexibilisacion di medidanan esey no ta nifica cu isla a bay back na normalidad mirando cu e variante aki ta sigui plama den comunidad y te ainda tin grupo di personanan cu no a wordo vacuna y cu lo por nifica un riesgo pa famianan y sernan keri.