Mester inverti den miho preparacion, incluso colaboracion institucional: Problema di nos studiantenan na Hulanda no ta unicamente idioma

Si tin un conclusion pa saca ta cu hopi studiante di Aruba, pero tambe di Corsou y St. Maarten no ta bay bon prepara pa Hulanda. Y aki no ta papia unicamente di e conocemento academico, sino henter e pakete di habilidad cu nan mester tin. Esaki ta conclusion di e investigacion cu ResearchNed a haci riba e reto di studiantenan di nos paisnan pa ta exitoso den nan estudio na Hulanda.

Segun e investigadonan, kendenan a haci e trabou riba peticion di cuater Minister di Enseñansa di Reino, e problematica ta compleho, y ta bin acerca cu studiantenan ta lucha cu diferente retraso y ta confronta presion halto, incluso e debe financiero. E problematica ta compleho, y ta bin acerca cu studiantenan ta lucha cu diferente retraso y ta confronta presion halto, incluso e debe financiero. Entre otro e cultura di nos paisnan ta mas dirigi na proteccion, examennan ta dirigi riba e enseñansa ricibi y no pa futuro; diferencia di idioma y isolacion di e islanan. Mas ainda, cada isla tin su propio acercamento pa loke ta enseñansa cu ta crea diferencia entre e gruponan tambe y ta haci cu e asistencia ta bira complica. Solucionnan ta depende di colaboracion y coordinacion di instancianan autonomo, entidadnan y paisnan cu diferente cultura.

E colaboracion awor no ta suficiente pa percura pa mehoracion. Ademas ta bin acerca, e limitacionnan financiero cu tin riba e islanan. Locual mester bin ta iniciativanan fuerte y conhunto cu un vision cla con, unda y cua ta e manera cu mester busca pa evita e problema pa studiantenan keda sin caba nan estudio cu exito.

Direccion di Solucion

E conseho ta cu mester ampliamente reconoce cu e exito di estudio memey di studiantenan di paisnan Hulandes den Caribe a abou y cu e provisionnan actual pa preparacion, escogencia di estudio, guia y sosten den estudio no ta suficiente. Enfoca unicamente riba un aspecto, sea ta idioma di instruccion cu mester a haci un miho escogencia di estudio ya no ta suficiente pa trece mehoracion. Mas medio, cooperacion, comparti conocemento y profesionalisacion den henter e cadena di enseñansa avansa den e paisnan den Caribe te cu e estudio superior ta necesario pa evita cu studiantenan di Caribe, a pesar di nan talentonan, ta keda confronta cu un acumulacion di problema.

E yabinan mas importante pa mehoracion ta keda na nos mesun paisnan. Tin hopi informacion y asistencia pa studiantenan riba studiamento y estudio, sigur online. E preparacion den enseñansa avansa sinembargo ta cuminza mucho laat y atencion riba e habilidadnan di studiamento den enseñansa superior, ademas di biba y siña independientemente ta relativamente abou compara cu na Hulanda. Mester bin mas impulso y compulsion den e preparacion pa estudio superior, cu un sistema di sosten amplio pa tur alumno y nan mayornan, ademas di control si berdad e hobennan ta internalisa e informacion pa por haci e transicion. E informacion mester ta mas personalisa, pa medio di testimonio di ex-studiantenan y cu posibilidad pa haci un estudio di prueba, for di cas mes.

Entrevista cu studiantenan a mustra cu aunke na principio nan a kere cu nan tabata bon prepara y informa, nan a cambia di opinion un aña despues. E esfuerso mas importante ta pa evita cu nan ta bay Hulanda sin e preparacion adecuado, motivacion y cu problemanan pa por cuminza nan estudio superior of continua nan estudio na Hulanda. Tur e aspectonan aki ta keda pisa durante henter e trayectoria di estudio. Si no mehora e preparacion y e guia na forma efectivo, e probabilidad pa exito di estudio na Hulanda lo keda chikito. Mas ainda, den un caso asina mester descurasha un hoben pa bay studia na Hulanda of mester pospone su biahe pa Hulanda te ora cu e ta miho prepara pa studia.

Kico por of mester bira miho den Caribe

Segun e investigadonan, enseñansa mester bira mas activo. E concepto di enseñansa pa medio di proyecto, siña con pa siña, enfoca mas atencion riba habilidadnan digital y locual mester pa siglo 21 ta esencial. Scolnan ta sali gana si ta comparti e miho practicanan y guianan/ conseho di scolnan cu si ta haci esaki exitosamente.

Re-integra preparacion den e curiculo y cuminza cu esaki mas trempan posibel. E proyecto VOBAS (Voorbereiding Antilliaanse Studenten) ta un di e bon ehempelnan pa esaki.

Scol mester percura cu mayornan ta mas envolvi den e preparacion di studiantenan

Mester bin mas y miho enseñansa di idioma, conecta na e exigencianan di e educacion siguiente. E studiante mester haya mas habilidad den papia, presenta, discuti/debate y traha relato.

Mester bin colaboracion den dunamento di in formacion, pa medio di entre otro envolvimento di ex studiantenan.

Busca mas posibilidad pa studia den propio region, cu ta crea menos shock cultural y tambe ta limita e asina yama ‘brain drain.’

E proceso di transicion mester ta amplio pero tambe obligatorio

Introduccion di un control di transicion amplio, cu ta mara na un conseho semi obligatorio si mester nota cu tin buraco den preparacion. Den e control ey mester analisa e escogencia di estudio (di con y cua ta e motivacion personal pa scoge e direccion ey), e preparacion practico, finanzas, sosten di ambiente social riba e isla y tambe e sosten na e luga di estudio, cu ta inclui cas, habilidad di idioma y con ta ricibi e studiante ora cu e yega Hulanda y bay su luga di estudio.

Un preparacion debido mester ta amplio y accesibel, ademas cu mester ta na e area tambe unda e studiante kier bay sigui cu enseñansa superior. Mester tene cuenta cu e elementonan general cu e estudio ta exigi, entre otro pa medio di studia online den e aña preparatorio. Esaki lo minimalisa cualkier retraso den estudio.

Un oferta mehora y amplio pa un aña preparatorio ta rekeri un colaboracion mas profundo entre e institucionnan educativo di Hulanda y entre otro Aruba.

E preparacion riba e islanan mester ta conecta cu e sistema encarga pa ricibi nan na Hulanda, y e guia den e prome aña di e institucionnan educativo.

Kico por bira miho of mester mehora ora di transicion

Mester organiza e recepcion y guia efectivo pa tur studiante y acopla esakinan cu e introduccion general di e institutonan educativo (na Hulanda); cada studiante di e paisnan den Caribe mester haya nan propio mentor y si por, durante e di dos aña di estudio tambe.

E conseho ta pa garantisa y stimula e calidad di e guia y funcion di mentor, cu mester ta basa riba e puntonan elemental cu e hobennan ta lucha cune manera bira independiente, vivienda y escogencia y progreso di estudio.

Kico por bira miho of mester bira miho den enseñansa superior

E oferta pa un estudio di prueba online y dianan pa bishita institucionnan online mester amplia, y e futuro studiantenan mester haya informacion di studiantenan actual cu ta splica e retonan real y e imagen real di e bida.

Mester busca forma pa sigui e trayectoria di studiantenan unabes nan ta na Hulanda, activamente busca informacion riba con nan ta maneha nan estudio y si tin problema, percura pa nan por haya ayudo pa medio di evento, tayer cu ta dirigi na por ehempel studiantenan internacional na institutonan Hulandes.

Comunidadnan manera HAN Hunto pa studiantenan di Caribe mester keda stimula of hasta crea, pa asina yuda institutonan traha hunto y monitor e exito di studiantenan. Consecuentemente mester bin miho cooperacion y coordinacion entre institutonan di estudio superior den duna informacion na futuro studiantenan di e paisnan den Caribe.

Bin cu iniciativa nobo

Ademas di traha na hisa e probabilidad di exito, e acercamento aki lo crea espacio pa iniciativanan nobo den enseñansa superior. Por ehempel lo por stimula cooperacion entre e institutonan na Hulanda y esunnan riba e islanan den e aña preparatorio. Pero tambe por coopera cu institutonan den Caribe pa programanan di estudio conhunto, cu ta permiti studiantenan completa (parti) di nan estudio mas cerca di cas. Entre otro por logra esaki a base di enseñansa online y cu e posibilidad pa caba e estudio na Hulanda. E investigacion no a duna guia con pa logra esaki. E ta un tarea cu e propio institutonan mes lo por traha riba dje.