“Mi ta kere e combersacion riba discriminacion nos tin cu sigui haci regularmente, y e no ta solamente pa universidad pero pa pueblo henter.”
Asina un di e participantenan invita na e charla di diversidad na Universidad di Aruba ta conta Bon Dia.

E siman aki a tuma luga un charla di diversidad na aula di Universidad di Aruba cual nan ta organisa cada aña pa asina conscientisa riba e topico di diversidad, tanto den estudio como trabou. Varios persona a keda invita, tanto di sector laboral como di mundo di studiante, incluyendo asina hende den nos comunidad di diferente descendencia, poniendo un enfasis riba con pa combati discriminacion.

Solucionnan
Arnaldo Maduro, kende tabata un di e invitadonan di TeleAruba, a splica cu e enfasis di e charla, unda tabatin diferente orado a keda riba e manera con discriminacion ta afecta diferente gruponan den sociedad y con mas y mas esaki ta birando un realidad tanto pa studiante como pa trahadonan. A pone un enfasis ademas di esaki riba abuso verbal, con esaki ta afecta e gruponan aki y con pa anda cu e tema di discriminacion den dimension verbal contra cierto personanan a base di nan apariencia of descendencia.

Sr. Maduro a papia cu studiantenan pa asina splica un poco con mester anda den un situacion, unda discriminacion ta reina. Nan a purba haya solucionnan pa temanan di discriminacion verbal, pero tambe discriminacion en general, e ta conta nos.

Importancia pa sigui papia tocante discriminacion
Loke tabata particularmente interesante ta cu a trece esaki na un nivel di bida diario ilustrando con e temanan di discriminacion tin impacto riba hende nan bida, segun sr. Maduro. E lo bay asina leu di bisa cu e temanan aki ‘nos mester papia di dje riba base diario, pa asina trece e topico central’. Sr. Maduro ta haya cu e universidad tin un bon iniciativa treciendo esaki dilanti cada aña, di e manera aki treciendo mas discusion riba un topico cu no ta keda discuti mucho hopi den nos comunidad.

“Mi ta kere e combersacion riba discriminacion nos tin cu sigui haci regularmente, y e no ta solamente pa universidad pero pa pueblo henter.” Un manera cu sr. Maduro a explora hunto cu e personanan cu a participa cu e charla ta por medio di bin cu asina yama Town Hall Meetings na centro di barionan, por ehempel. “Di e manera aki nos por trece discusion positivo na un problema cu ta afecta nos comunidad di manera negativo.”

Aunke sr. Maduro ta haya cu mas persona mester por inverti mas tempo den conscientisacion riba e topico aki, e no ta descarta cu tempo ta un factor pa personanan cu tin tiki tempo disponibel despues di trabou, scol, etc. “Si nos tur logra inverti mas tempo den esaki mi ta kere ta hopi problema cu nos tin riba nos isla nos lo por soluciona.”

Bira mas consciente di ‘filtro’ di hende
Un studiante di universidad cu a participa, esta Joel Recappe a haya e charla aki cual el a participa pa prome biaha cun’e sumamente interesante, particularmente pa mira diferente perspectivanan ‘cu mi no a yega di wak anteriormente’. E representacion cu a participa tabata amplio, incluyendo e consul di e pais Filipino Ami Henriquez-Mendez.

“Ta interesante pa tende e storianan di personanan asina cu aunke bo conoce nan personalmente nunca bo sa tende henter nan storia di nan descendencia, sea si ta personanan di habla Latino Americano, Costariqueño, Filipino, Jamaiquino y Haitiano.”

Un di e cosnan cu a keda menciona den e charla tabata cu ‘cada persona tin un filtro por medio di cual nan ta mira e mundo rond di nan’. Esaki ta algo importante pa realisa segun sr. Recappe, pa asina nos tur por ta mas consciente y acepta di unda cada un di nos prohimo ta bin. E hoben ta conta cu e tin descendencia di paisnan manera Guyana y Surnam, pero cu e mes no a experiencia discriminacion, pasobra su descendencia lo ta di e paisnan aki. “Mi mes no a pasa den algo asina, pero mi ta wak si con importante e ta pa adresa e tema aki.”

Sinembargo den reunionnan familiar, unda su famia lo bin bishita na Aruba, el a mira cu hopi di su famia a pasa den cierto situacionnan fastioso cu discriminacion a base di nan aparencia y nan accento, biniendo di Guyana.“

Nos tin cu comprende e diferente lensnan cu hende ta wak via di dje.”