– Den combersacion anterior cu entre otro Departamento di Rijbewijs y dokter di cas Van Trigt, Bon Dia Aruba a toca riba e tema di declaracion medico pa haya rijbewijs y si mester bin algun ahustacion den e maneho. Minister di Salud Publico Alex Schwengle ta splica awor cu en berdad mester cuminsa introduci algun cambio den e maneho aki mirando cu esaki no a wordo adapta den basta tempo.
Dos siman pasa Bon Dia Aruba a toca riba e tema di declaracion medico pa haya rijbewijs relaciona cu e caso contra Indra Stamper. El a haya un sentencia mientrastanto niun biaha nan no a nenga su rijbewijs sabiendo cu e tin epilepsia.
Bon Dia Aruba a acerca dokter di cas Van Trigt cu a declara cu kisas mester bin algun ahustacion den e maneho aki despues di tanto tempo cu esaki no a wordo haci. Y segun declaracion di Departamento di Rijbewijs: “Bo por ta suf of loco mes, si e dokter ta bisa cu e persona ta apto pa core auto, nos no por neng’e.” Locual sr. Van Trigt a bisa Bon Dia Aruba, e manera actual di test pa haya rijbewijs no ta bon. Den su opinion dokter di cas so mester ta permiti pa duna declaracion medico y no ta asina cu bo por yega bay busca esaki na cua dokter cu ta cu kisas no ta bay duna bo un analisis adecua.
Bon Dia Aruba despues a bay busca un reaccion cerca minister Schwengle riba e tema aki kende ta bisa: “Mi tambe a yega di traha como dokter di cas algun aña atras pa un temporada breve unda regularmente bo ta haya cliente ta bin cu un declaracion pa rijbewijs. Ta skirbi riba e formulario tambe como procedura ta kico ta e cosnan cu bo mester check.” Medicamente segun e mandatario, dokternan sa con pa haci e trabao aki tambe pues con pa check e bista anto si tin duda bo ta manda e pashent un dokter di wowo, bo mester check presion anto varios otro aspecto tambe.
Minister Schwengle tin henter un otro opinion di e asunto. E ta bisa cu: “Mi ta kere cu ta importante berdad pa e analisis medico ta debidamente. Mester revisa e lista di exigencianan cada tanto aña pa wak si en berdad e ta ‘up to date’ anto si esey ta e rekisitonan cu bo merece pa bo cualifica pa haya rijbewijs.” Por ehempel, no ta para riba e formulario si e persona tin 300 kilo anto pa marca cu e por tin problema di drumi. Sin embargo, si e meneer ta cada bes pega soño tras di stuur, specialmente si e ta coriendo un vehiculo grandi, lo bo prefera pa e persona no tin rijbewijs mas segun e minister, pasobra un persona asina por causa un accident.
Cambio den sistema
E mandatario ta haya bon si pa cuminsa check e modelo cada cinco aña anto revisa rekisitonan y exigencianan cu bo mester pa core auto. Den e manera aki si mester haci algun adaptacion riba nan pa e ora por yega implementa nan mesora. Bo mester tambe tin e obhetividad segun e mandatario pa ora cu por ehempel bo tin un cliente cu ta un amigo di bo, pa na dado momento e no bira mas dificil pa dokter tuma decisionnan profesional of nenga bo algo. Eigenlijk un otro dokter e ora lo mester tira un bista y haci analisis. Dokternan cu ta hopi bon como por ehempel manera dokter di seguro of dokter cu ta traha na SVB of Medworks. ” E dokternan aki por ehempel no ta dokter di cas anto nan no ta mara na cliente cu nan ta wak regularmente, nan ta djis haci trabao di control.
Por ta lo tin otro manera pa haci e pero seguramente tin diferente opcion y kisas eigenlijk e no ta bon idea pa duna dokter di cas e responsabilidad aki segun minister Schwengle. E mandatario ta splica cu dokternan di cas ta wordo buta den un situacion penoso entre su cliente ora mester neng’e algo manera un declaracion medico pa motibo di salud. “Bo mester ta duro den nenga e pashent por ehempel si e bista no ta bon. Bo mester para duro den bisa sorry, tanten cu bo no bay un dokter di wowo pa determina bo problema, bo no ta haya bo rijbewijs.” Aparentemente tin casonan cu awo ta demostra cu e sistema aki no ta funciona adecuado. “E minister concerni (di Husticia) awo lo mester bay haci un evaluacion di e situacion como tambe evalua con pa mehor’e, anto kisas por ehempel dicidi di saca esaki for di man di dokter di cas y hinc’e den dokternan mas obhetivo pa wak con nos ta yega na un miho calidad di servicio,” minister Schwengle ta conclui.
