Mester haci mas ensayo pa rescate bao awa, segun Inspeccion di Seguridad di Defensa Hulandes

Fayo den preparacion adecuado a contribui na morto di piloto, miembro tripulacion di helicopter di Marina Real cu a cay den awanan di Aruba

E bapor di patruya di Marina Real Hulandes Zr. Ms Groningen no tabata suficiente ekipa pa por a efectua un rescate di e personal cu a perde nan bida ora cu nan helicopter a cay den awanan di Aruba, dia 19 di Juli 2020. Esey ta conclusion di un investigacion riba e accidente fatal cu a costa bida di dos militar. Tweede Kamer a ricibi e conclusion di e investigacion aki e siman aki.

E accidente, cu a laga un impresion grandi atras, a sosode riba un diadomingo na Juli, prome cu e isla a habri su fronteranan. Tabata den un periodo cu tabatin hopi control riba e fronteranan di e islanan ABC, particularmente Aruba. E helicopter NH-90 cu un tripulacion di cuater persona tabata riba un vuelo di patruya di un ora riba lama. Despues di e patruya, e ekipo a bolbe e bapor pa sigui train habilidadnan pa yega cerca y aterisa. E obhetivo di e maniobranan aki tabata pa mantene e habilidad y experticio di e tripulacion di tanto e helicopter como esnan cu riba Ms. Groningen na nivel. Pero tabata durante ehecucion di e circuito di aterisahe cu e helicopter a cay na awa. Dos miembro di e tripulacion, cu tabata sinta patras den e helicopter a logra sali di e cabina y a sobrevivi e accidente. E otro dosnan den e cockpit no a sobrevivi.

Mesora despues di e accidente a inicia un investigacion di parti di e Inspeccion di Seguridad di Defensa, IVD cu mester a identifica e causa, y con pa evita accidentenan similar den futuro. IVD no a limita su mas na e accidente so, pero tambe riba e posibilidadnan pa por a scapa di e cabina di e helicopter y e accionnan di rescate for di e bapor mes y door di Wardacosta cu a yuda den e buskeda.

Vuelonan

E helicopter a bula den e ultimo fase di e circuito di entrenamento cu biento den lomba y na un nivel hopi abao y no tabatin suficiente capacidad mas pa por a baha na un forma controla. E piloto a baha e nanishi di e helicopter y su capacidad cuater seconde prome a cay den lama. E maniobra aki a pone cu e helicopter a haya mas velocidad y tambe alabes tabata baha mucho lihe. E intento na final di e piloto pa purba hisa e aparato cu tur su velocidad y forsa posibel tabata mucho laat y no por a evita cu e helicopter a dal den awa. Den e investigacion no a haya ningun indicacion di influencia otro cu e maniobra aki. Nada di e condicion di tempo rond di e bapor of hasta fayo tecnico di e helicopter a causa e accidente.

Experiencia

IVD a identifica algun factor, den e cadena di sucesonan cu a bin prome, cu por splica e actuacion of e falta di actua di parti di e tripulacion. Por ehempel, lo por tabatin un reduccion den e conscientisacion riba e medio ambiente unda e helicopter tabata, un limitacion riba e risico y e posibilidad cu e piloto por a pensa cu e ta den un situacion di un Vortex Ring State, VRS. Esaki ta un condicion aerodinamico peligroso cu por presenta durante vuelonan di helicopter ora un sistema di vortex ta afecta e rotornan di e aparato, cu por causa perdida di altura. Segun IVD, e capacidad di un tripulacion pa evalua e situacion real y anticipa esaki ta determina pa su educacion, training y experiencia. E pregunta ta si un piloto cu apenas a cuminza bula tin suficiente experiencia prome cu e por lanta vuelo pa misionnan, cu mas tripulacion abordo. Den un contexto unda algun miembro di tripulacion ta opera pa lunanan largo di forma independiente, sin supervision di coleganan mas experiencia, tin suficiente experiencia pa por tuma decision y pa anda cu maniobranan di vuelo cu tin hopi reto. Esaki ta un condicion pa garantisa cu ta ehecuta operacionnan di vuelo di forma sigur y ta interpreta y implementa e reglanan na e forma adecua.

Factor di sobrevivencia

Despues cu e helicopter a cay den awa, tabata na e tripulacion na prome instante pa por scapa di e aparato. Dos miembro di e tripulacion sinta patras a logra sali y nan a sobrevivi. Pero e dosnan sinta den cockpit no a scapa. E piloto a logra sali di e cockpit pero no por a los su mes di e helicopter. E ta posibel cu e cabuya di seguridad cu tabata mara e piloto na e flotante di rescate a keda pega na su stoel. E otro miembro di e tripulacion den cockpit, e copiloto, no a sali mes di e stoel, probablemente pa motibo di a sufri un lesion na momento cu e helicopter a dal den awa. Ambos a muri hoga.

E probabilidadnan di sobrevivencia di tripulacion di helicopter despues di un ‘ditch’ den lama ta bira mas grandi si e training di sobrevivencia ta mas realistico y ta haci esaki cu medionan di sobrevivencia cu ta abordo. Segun IVD, e investigacion ta brinda espacio pa mehoracion pa mehora e preparacion y entrenamento pa por scapa ora cu un helicopter cay na awa. Ta trata aki di exigencianan cu e Autoridad di Aviacion Militar y e Commando Forsa Aereo por pone na training, e medionan cu mester usa, y forma di guia y control riba nan.

Accion di rescate

E helicopter a cay como 130 meter leu di e bapor. Mesora a cuminza accionnan abordo Groningen pa efectua e rescate di e tripulacion y a alarma Wardacosta. E organisacion riba e bapor a mustra resiliencia durante e accion di rescate, cu mester a keda ehecuta bao circunstancianan dificil. E investigacion a saca afo e elementonan cu a tarda e rescate di e tripulacion, hasta factornan cu a dificulta esaki.

Accionnan a bordo ta den prome instancia dirigi na rescata esnan cu ta den e helicopter accidenta. Miembronan di e tripulacion di e ekiponan di rescate mester por saca e victimanan di e aparato accidenta cu por keda un parti bao awa. Pa esey mester tin un repertorio di accion unda esnan encarga cu e rescate por actua eficiente, cu conocemento y cu e medionan adecuado. E accidente a laga sa cu e tripulacion di e bapor di patruya Groningen, a pesar di tur esfuerso y resiliencia, no tabata suficiente ekipa pa un rescate. Ta trata aki di e nivel di preparacion di e tripulacion di rescate, e forma con e aparatonan di rescate tabata ekipa, e posibilidad di duna cuido apropia na esnan cu tabata hogando y e influencia di tur e responsabilidadnan acumula di e tripulacion di e bapor riba e habilidad pa por actua.