Un punto di e plan strategico di e directiva di Camara di Comercio (KvK) ta consisti di crea un asina yama white paper, den cual nan ta trece aspectonan cu e gremio comercial aki ta considera importante pa soluciona na corto tempo. Ya caba e documento final aki a wordo otorga tanto na Gobernador di Aruba y tambe na Prome Minister di nos pais.

E documento aki ta compila e informacion y inkietud cu frecuentemente ta yega na atencion di KvK di parti di e empresarionan. Un di e topiconan cu ta resalta den e documento aki tin di haber cu influencia y oportunidad di e-commerce na Aruba. Alexlindy Croes kende recientemente a keda eligi como miembro nobo di e directiva di KvK y kende ta encarga cu e comision di e-commerce a bisa cu aña pasa KvK a bay basta leu cu e forma di haci negoshi aki. Nan a elabora riba e tema aki hunto cu Banco Central Aruba (BCA), y KvK ta aplaudi cu tanto BCA como otro banconan local a cuminsa duna algun pasonan importante pa logra e-commerce na Aruba.

E-commerce na Aruba
Sra. Croes a bisa cu mundo ta draai hopi lihe y tur cos ta na alcance di bo man pa medio di telefon, y Aruba tambe a bay den e tendencia aki. E ta haya cu nos por tin un plataforma unda nos por ofrece comercio for di un localidad fisico of no. E ta haya cu e opcion aki por yuda pa comercio por crece mas ainda na Aruba.

Sinembargo un punto pa implementa e-commerce tin di haber cu nos leynan mester wordo actualisa na realidad di awendia. Tambe e inversion den instrumentonan tecnologico tambe ta yuda pa stimula e tipo di actividad comercial aki, ya cu tur aña e tecnologianan ta cambia y mester evalua ki sorto di tecnologia nos mester uza. Otro punto cu e ta considera importante pa e desaroyo di e-commerce na Aruba ta esun cu ta bin cu un acuerdo cu duana pa traha mas lihe y haya clear un poco mas lihe.

Sra. Croes ta forma parti tambe di e comision di caya grandi cu KvK. Como parti di e comision aki e ta bay pusha e forma di haci comercio aki, sin laga afo caya principal na San Nicolas. El a laga sa cu e-commerce ta un balor agrega pa e companianan existente por aumenta nan benta.

“E generacion di awor riba telefon ta cumpra nan cosnan…” El a pone como ehempel cu via Amazon y cu un simpel click riba un boton e por haya cualkier sorto di producto den dos siman na Aruba. E diferencia ta cu si nos tin e servicio aki riba nos isla e consumidor por haya su producto mas lihe y esaki ta yuda e comerciante pa nan benta bay ariba.

Encuanto e competencia riba prijs di un producto cumpra localmente versus un producto adkiri via Amazon, e ta haya cu mester adapta nos leynan anticua pa yega na un areglo pa atende e parti aki. Nan lo bin cu proposicionnan pa e minister concerni riba e tereno aki.

Gobierno
E mesun dia cu prome minister Evelyn Wever Croes a anuncia e introduccion di un comision pa atende cu e diferente comerciantenan estableci den caya grandi y scucha nan preocupacion, el a referi na e-commerce y/of on line shopping . Pues e ta un di e topiconan cu e comision conforma pa varios ministerio ta bay atende cu ne.

Na e ocasion ey e mandatario a bisa cu on line shopping ta un fenomeno mundial “unda e ta gara tera of rais el a afecta benta di retail manera nos ta bisa den comercio.” E mandatario a bisa cu mescos cu otro paisnan a atende cu e reto aki, a nos tambe mester bay atende cu ne. Pero e ta un fenomeno cu ta existente y e ta un fenomeno mundial, y e ta “un fenomeno cu aki na Aruba nos no ta bay stroba, pero nos mester haya un balans den dje.”