Bon Dia recientemente a combersa cu un persona experto den no solamente e anatomia y cultivacion di e mata cannabis, pero tambe e tin experiencia cu resultadonan positivo pa diferente hendenan cu a acerca su persona cu problemanan di salud.
E experto ta desea di keda anonimo, mirando tur e controversia innecesario cu tin rond di e tema aki, pero tabata dispuesto pa conta nos un poco riba su opinion tocante henter e asunto di cultivacion di Cannabis aki na Aruba. “Si Aruba -cu ta un isla hopi chikito- lo por inverti un poco mas di tempo den investigacion lo ta ideal. Mi no ta bisa pa legalisa mesora, pero haci e investigacion/estudionan necesario y cuminsa discuti riba dje. Pa nos mesun hendenan tambe cuminsa conscientisa nan mes mas riba e tema na un forma positivo”, e ta bisa.
Por ehempel e ta bisa cu antes Aruba tabata cultiva tabaco, pero cierto matanan no ta crece mas pasobra algun bacterianan a deshaci di nan manera e cottonplants. Pero ainda nos tin algun otro matanan manera tamarijn, aloe, neem, noni y kenepa cu tin asina hopi nutricion y propiedadnan medicinal. E ta splica cu: “Basicamente nos mester regresa bek na naturalesa, e mesun sabiduria ey di sa cua mata ta haci kico, mescos ta conta pa cannabis. Mi por conta bo di un persona cu tabata sufri di migraine pisa, despues di a purba azeta di Cannabis esakinan a stop. Un otro persona cu ta sufri di atakenan di epilepsia a tuma azeta anto esakinan ta stop. Nos dokternan mester cuminsa investiga e cosnan aki.”
‘No ta Droga’
E experto ta bisa cu ora bo ta hoben, aparentemente bo ta cuminsa uza e mata aki djis pa curiosidad te na momento cu bo realmente cuminsa reconoce e planta. Basicamente ora bo yega un cierto edad bo ta realisa cu e planta tin otro beneficionan pa nos, bo ta cuminsa mir’e diferente tambe. “E ta semper un cuestion di husga bisando cu bo ta ‘humando droga’, pero con abo sa cu e ta droga? Semper ta ideal pa lesa tocante algo y studia prome cu husga.”
Ora bo realisa cu e planta tin tanto otro beneficio pa no solamente salud, pero pa produci diferente otro tipo di producto natural, bo ta cuminsa wak e ‘bigger picture’. E experto ta bisa cu pa e homber chikito, henter e asunto aki ta bruha, pero pa esunnan cu si sa kico ta pasando, pa nan e ta algo otro pa traha placa. “Ta mescos si abo gusta mango pero bo no mester e planta. Bo ta exigi pa e mango pero no e mata, ta mescos cu Cannabis: nan ta tuma locual nan kier pero na final di dia e ta un planta.” Internacionalmente tin incidentenan unda dokternan ta haya bonus/comisionnan pa e cantidad di remedi cu nan por bende. Y esaki ta un di e factornan pa kico nan no kier pone dede riba e tema aki, segun e experto ta splica nos. “E companianan grandi di medicina ta esunnan cu ta single out kico nan kier, anto locual nan no mester/kier nan ta tira afo. Pues mester tene cuenta cu cultivacion di planta cu mas CDB aden, pa despues bende esaki mas caro tambe. Mester reconoce cu e planta ta funciona y cu e no ta un droga. Ora pone kimico den e wega e ta bira un droga, pero e planta riba su mes ta manera cualkier otro.”
Dokter rabia cu pashent
“Y awor e cos ta bayendo den direccion di cultiva e mata aki sin THC (Tetrahydrocannabinol) y solamente CBD(Cannabidoil) anto esey no ta e manera”, e ta sigui splica. E intencion ta pa cuminsa cultiva mata sin THC pasobra e ta un haltura y CBD ta un substancia (neutral) den e mata mes. Cu ambos substancia den e mata, e ta funciona perfectamente segun e experto. E ta bisa nos cu e tin un conoci di dje por ehempel cu algun luna pasa e tabata tin cancer. E mester a cuminsa haci kimo, anto el a cuminsa bira malo, no por a come ni drumi drechi.
Despues un amigo di dje a bis’e si e ta dispuesto pa purba azeta di cannabis manera tratamento alternativo. “Na e momentonan ey e tabata dispuesto di purba kico cu ta. Basicamente el a cuminsa uza e azeta, despues di dos luna el a bay haci su checkup na dokter y dokter ta bis’e cu e cancer a retrocede. Pues e dokter a pensa cu e medicina cu el a dun’e tabata yuda, pero e pashent no tabata uzando esakinan mas.” E ta sigui conta nos cu e dokter a rabia cu e pashent, pasobra el a stop di tuma su medicina y bay riba medicina alternativo sin sa e efectonan. “E ta naturalesa, e no ta kimico. Pa kico na luga di rabia, boso no ta pone un dede riba dje y cuminsa haci test? Nan djis no ta haci’e.”
