Mester cuminsa implementa protocol pa normal nobo na tur compania y negoshi

Awe den oranan di atardi, Gobierno di Aruba a ofrece un conferencia di prensa den cual a papia tocante e normal nobo, cu ta cuminsa awe pa supera e crisis di Covid-19. Ademas SVB a duna di conoce e guidelines cu negoshinan mester implementa pa comunidad cuminsa adapta na esaki.

Dr. Myron Genser di SVB a trece dilanti cu varios compania, negoshi y sector lo cuminsa habri bek pa trahadonan na pia di trabou, pero esaki tin algun condicion, manera medidanan preventivo relaciona cu distanciamento social (fisico) y medidanan di higiena. Esaki ta e condicionnan cu SVB, Gobierno di Aruba y otro partner a pone como minimo pa cumpli cu cada trabou, cu ta conta pa tur hende y lo wordo controla. E trahadonan y doñonan di trabou mester tin responsabilidad pa cu esaki.

Di mesun manera, el a informa cu esey ta forma parti di un protocol cu ta drenta na vigor desde awe y cu tur dunado di trabou mester sigui. Por haya e protocol aki den cuatro idioma riba e website di www.arubacovid19.org

E implementacion di medidanan ta keda bou responsabilidad di e doño di trabou, trahadonan y esunnan cu ta bishita e luga. Ademas Genser a menciona cu ta bay tin un task force pa controla cu cada empresa ta cumpli cu e medida aki y den caso cu no cumpli, e task force lo obliga di instrui pa nan cera.

Genser a expresa cu e tres punto riba cual lo concentra mas riba ta garantisa e distanciamento social, garantisa e bon higiena na luga di trabou y na cas, di ultimo e parti cu ta relaciona cu empleadonan of clientenan malo riba tereno di trabou.

E medidanan pa garantisa distanciamento social tin di haci cu 1.5 meter di distancia entre personanan. Cada compania mester tuma e medida aki y mester zorg pa empleadonan tambe por traha for di cas of si por implementa orarionan flexibel.

Tambe, Genser a indica cu doño di trabou mester coloca borchinan of indicacion como flecha na vloer pa tene den cuenta e distanciamento social, tambe mester tene na cuenta cu e fluho di persona den e compania.

Di mesun manera, el a menciona cu companianan por retira, separa of proteha e mueblenan manera mesa, stoel y banki, tambe reemplasa reunionnan fisico mas tanto cu ta posibel y haci’e di manera digital, si den caso esey no por ta posibel tuma cuenta cu distanciamento y haci un lista di esunnan cu a asisti pa e reunion pa motibo cu si mester haci un contact tracing e lo por bira mas facil pa DVG y asina wak ken tur tabata den reunion.

Di loke ta trata negoshinan, nan mester limita e cantidad di bishitante teniendo na cuenta e distancia social, asina como tambe e bishitantenan cu no ta tene nan mes cu e medidanan nan lo wordo pidi pa bandona e organisacion of tereno di e negoshi inmediatamente.

Si un persona ta presenta sintomanan di grip of di Covid-19 mes no lo wordo permiti pa drenta den e negoshi y si e personal ta ripara cu un cliente tin sintomanan tambe por pidi pa e cliente lo bandona e luga.

Di loke ta trata medidanan pa garantisa higiena, Gersen a bisa cu cada dunado di trabou mester promove esaki tambe den clientenan y trahadonan, tur superficie como lessenaar, obheto riba dje como telefon, keyboard, etc mester wordo limpia cu desinfectante regularmente por lo menos dos biaha pa dia.

Genser tambe a declara cu dunado di trabou mester coloca hand sanitizer na entrada di e compania y luganan cu trahadonan ta frecuenta mas, promove labamento di man corecto, asina como tambe evita mishi cu wowonan, boca of nanishi.

Pa finalisa, Genser a splica cu cualkier empleado cu lo haya problema di respiracion lo por comunica cu su dokter di cas inmediatamente, ademas el a manifesta cu SVB lo duna sosten pa empresanan pa loke ta trata training riba protocol, tambe facilita checklist pa e doño di trabou por zorg pa tin y lo sigui tin tur cos na su luga pa facilita e implementacion y monitor di e protocol.