Nos tin bishita den e dianan aki di e maximo responsable pa asunto di Reino, e secretario di estado Hulandes. Despues di e acuerdo formal, awor e momento a yega pa acorda e asunto mas den detaye practico, no solamente pa loke ta trata presupuesto 2021, sino tambe pa e cantidad di tema cu ta aparece den e Landspakket specifico pa Aruba. Di antemano a tende masha poco di e posicion cu gobierno di Aruba a tuma pa loke ta implementacion di e puntonan riba mesa.

Por ehemplo, pa menciona un di e puntonan mas importante, con ta bay haci cu e payroll enorme cu gobierno tin ainda? A logra yega na un reduccion di e gastonan di personal a traves di un reduccion di 12,5% di e salarionan den nan totalidad, pero awor lo mester bin mas medida pa continua baha gasto, pasobra simplemente nos no a yega ni cerca di e punto unda por yama e gastonan aki aceptable y sostenible. En todo caso, na e momento esey no ta e situacion. No lo ta nada facil pa cuminza atende e asuntonan aki, y te awor esey no a tuma lugar tampoco. E unico cos cu nos a haya pa mira, ta e nerviosismo di mandatario pa logra pone nan ‘hendenan di confianza’ na otro lugar pa garantiza nan un entrada, loke a conduci na e incidente cu e ‘coordinadornan’ cu a bira de repente chauffeur pa pacient di dialyse. Te awe no a contesta e pregunta con a para cu e hendenan cu den e mesun crisis aki a perde nan pan. Un manera poco straño di pone ‘e ser humano central’.

Manera por a anticipa den un aña di eleccion, nos por a haya un discurso positivo y anima di nos Promer Ministro na inicio di aña nobo. El a elabora riba e iniciativanan cu gobierno a tuma o lo tuma pa stimula loke nos ta mira como negoshi chikito. Esaki relaciona cu turismo, nos cultura y tradicionnan, monumento historico, etc. Esey ta un paso positivo pasobra e atencion ey tabata falta pa basta tempo, y ademas ta algo cu na promer lugar mester haci pa nos mes, y no pa turista so.

Loke nos no a haya di tende den e discurso di e mandatario ta comentario riba e plannan cu lo por tin mas impacto riba e recuperacion economico durante 2021, y esey ta por ehemplo e proyectonan cu a presenta aña pasa. Ta trata di rehabilitacion di e refineria y e plannan pa bin cu produccion na escala grandi di cannabis. Esaki ta pasobra a yega na e realismo cu por lo pronto no por spera tanto di esakinan? Basta mantene e realismo, señala anteriormente caba den e Editorial aki, cu hasta un crecemento grandi di e sector artesanal y agricola aki den termino di porcentahe di nos GDP no ta haci tanto diferencia, mester actividad cu ta gana divisa, y nos no ta mira esey.

Tambe gobierno, a traves di nos ministro encarga cu asunto economico y finanzas, a anuncia varios incentivo pa sector priva, entre otro reduccion di tarifa di importacion y di otro forma di impuesto, cu tin un efecto general pa sector priva. Esaki tambe ta yuda pa percura pa mas poder di compra den man di e consumidor y un situacion financiero mas manehable pa un empresa. Hunto tur e medidanan, aunke di aplaudi, no ta resolve e problema principal di nos economia, y esey ta cu e sector primordial di nos economia – turismo – ta na inicio di un caminda largo di recuperacion. Nos por a mira un temporada di dianan di fiesta di fin di aña bastante anima, cu un fluho razonable di bishitante di exterior, pero lo mester mira con e lunanan venidero ta bay bira. Nos a referi den e Editorial aki caba na e analisis di Banco Central, cu ta mustra dos cara, un positivo y otro di continuacion di e panorama negativo como posibilidad real.

Tur esaki ta haci cu den e dianan aki di deliberacion cu e secretario di estado pa asunto di Reino, no tin un perspectiva positivo pa tuma como punto di salida, salvo riba tereno di salud publico, unda hunto cu Hulanda por cuminza distribucion di vacuna pa Covid-19, loke ta aumenta nos posibilidad pa bolbe na un bida mas normal, y ofrece e bishitante tambe un lugar sigur. Loke nos no ta comprende mucho bon ta pakico, mientras lo ta logico pa actua conhuntamente den Reino, de repente a dicidi di crea un pasaporte di vacuna hunto cu un partner cu mester convence cualkier pais na mundo di nan iniciativa. Un poco straño si nos ta colabora completamente cu autoridadnan Hulandes riba tereno di salud publico, y awor ‘out of the blue’ ta bay den otro direccion? E mandatario concerni tin cos pa splica aki.

Di tur manera, ta e asuntonan cu Hulanda a enfatisa den e Landspakket cu awor mester drenta den e fase di implementacion. Esaki ta bay ta mas dificil cu e negociacionnan te awor, pasobra mester papia concretamente di no solamente di cambio, sino mas bien: con? Aki ta unda di un manera tactico lo mester busca e mihor solucion pa Aruba. Ta importante pa mira cu nos por di berdad coopera den Reino, sin cu tur cos mester bira un problema.