E discusion riba si e cobramento pa usuarionan di Kamer van Koophandel en Industrie Aruba (KvK) tin base legal of no ta permanece. Siman pasa, minister encarga cu Asuntonan Economico, Geoffrey Wever a manda un comunicado pa informa tocante un reunion cu el a tene cu e organismo aki.

Den e comunicado, ta menciona cu cada seis siman KvK ta reuni cu minister Wever pa discuti strategia riba diferente topico y pa haci palabracionnan cu ta na fabor di e comercio na Aruba.

Sinembargo, tabata spera mas informacion tocante un topico cu for di algun siman atras ta bin halando atencion di comunidad pa loke ta trata si cobramento pa usuarionan tin base legal of no y ki pasonan ta bay tuma en cuanto esaki.

KvK a anuncia recientemente restriccion di acceso publico na e registro comercial online, y a introduci un modelo di “pay-to-play”, a base di abonado. A introduci un structura di tarifa cu un pago di Afl. 1,200 pa aña of Afl. 300,- pa kwartaal, pa acceso online na e registro comercial.

Segun e documento cu e bureau di minister a manda, den reunion cu KvK a papia di diferente tema y proyecto cu minister Wever a bin realisando hunto cu otro partners, como por ehemplo ATIA Trade Mission pa Panama, plan di revitalisacion di San Nicolas y Oranjestad y e cobramento di KvK.

“Den e reunion aki nos tabata tin e oportunidad pa intercambia di idea over e topiconan aki. Mi ta considera KvK un partner valioso di nos ministerio, y nan input, consehonan y preocupacionnan semper ta wordo tuma den consideracion. Un economia no por florece si no ta pa e forza di sector priva y pa e motibo ey dialogo continuo cu sector priva ta sumamente importante,” segun minister Wever.

Bon Dia Aruba a tuma contacto cu minister Wever riba e tema aki, pero no a logra haya un contesta di su parti.

Mientras tanto, e preguntanan pa minister ta keda: KvK por restringi acceso online pa publico na e registro online? Talvez esaki ta yama un siguiente pregunta: KvK tin e base legal pa impone un tarifa anual di Afl. 1,200,- pa aña o Afl. 300,- pa kwartaal? Si e contesta pa e segundo pregunta ta no, e ora e contesta pa e prome pregunta ta bira irelevante, te ora crea un base legal.

Na luna di juni, Bon Dia Aruba a publica un articulo extenso di Mr. Delo Gomez e cual a publica riba su LinkedIn y ta ilustra lo siguiente: “Pagando e prijs? Cobranzanan di Camara di Comercio ta surpasa limite legal?”

“Institucion publico ta e fundamento di un sociedad cu ta funciona. Nan ta actua como ‘watchdog’ pa mantene ley, provee cierto servicio esencial, y hopi biaha ta actua pa proteha derecho di ciudadano. Sin embargo, ora e institucionnan aki desvia di cuadro legal, esaki ta mina confianza publico y ta perhudica mantencion di ley. Un asunto reciente cu Camara di Comercio (KvK) encuanto cobro pa acceso online pa Registro Comercial y algun cobro adicional pa cierto servicio ta ehemplo di e problema aki.

Aki ta explora e complehidad alrededor di e problemanan aki, ta haci escrutinio encuanto e requisitonan estatutario pa un base legal adecua, ta subraya e importancia di adherencia na requisito estatutario y ta provee algun sugerencia pa pasonan necesario pa un solucion. Mientras a atende e preocupacion y analisis legal cu Camara di Comercio, e discusion aki no mester ta tras di porta cera.

E base legal aki ta cu Camara di Comercio ta un entidad publico, estableci a base di e Ordenanza Nacional encuanto Camara di Comercio. Mientras un di obhetivonan di e Camara ta pa duna proteccion na interes di empresa priva, e Camara mes no ta un compania priva y no por actua di e mesun manera agil cu talvez un negoshi priva den un mercado habri por. KvK mester sigui e reglanan general, estableci pa legislacion aplicable.”

Un aspecto ta cu KvK ta mara na impone pago y colecta placa, cu ta rekeri un base legal claro. KvK por cobra publico, cu un base legal specifico. “Mi ta kere cu KvK ta carece di e autoridad legal pa cobra e tasa anual di Afl. 1,200 pa aña o Afl. 300 pa kwartaal pa acceso online,” el a sigura.

“Den mi discusion cu KvK, y mi ta contento cu nos por tin e discusionnan aki, KvK a referi na articulo 13, inciso 1 e, di e Ordenanza encuanto KvK pa hustifica provee un servicio adicional y cobra anto tarifa mas halto. Sin embargo, e argumento aki ta problematico pa varios motibo. Pa cuminza, no ta claro pakico por cobra un tarifa mas halto bao di articulo 13, inciso 1 e, si articulo 19 di Handelsregisterbesluit ta limita e tarifa na Afl. 15. Retribucion, manera menciona den articulo 13 inciso 1 e, por cobra solamente basa riba LV Retributies (Ordenanza encuanto Retribucion) y un lbham specifico. No tin un lbham pa KvK, cu ta provee un base legal pa tal cobranza.”

Na luna di juni tambe KvK a reaccion riba e punto aki mediante un conferencia di prensa, caminda nan a splica e motibonan di a tuma e decision di cobramento pa consulta di registro comercial online, specificamente e director ehecutivo di e organismo Martijn Balkestein.

E registro comercial online aki ta un servicio adicional cu KvK ta duna y no ta un obligacion pa ley, nan a haciel’e pa comunidad por tin un servicio mas comodo pa haya datonan y nan ta considera esey hopi importante, ademas ta un sistema cu ta funciona banda di e registro di papel cu nan tin unda tur persona por solicita esey di manera gratis na KvK.

Pero nan a realisa cu e gastonan cu nan tin ta halto y esey ta nifica cu e cobransa aki ta bay pa mantencion di e sistema digital “aunke cu e gastonan cu nos tabatin ta halto pa motibo cu e sistema cu nos a bin ta costa un par di miyon florin, pa mantene esey ta costa nos 300,000 florin pa aña, pero aunke e gastonan ta halto KvK no a subi e tarifa di su productonan desde 2009 cu na e momento ey tabatin un inflacion di 21%.”

Balkestein a señala cu ta importante pa hende mester realisa cu KvK ta un compania Sui Generes, loke ta nifica cu nan mes mester genera nan entrada y nan no ta un departamento di gobierno, ni ta haya subsidio, e contribucion anual cu companianan ta paga mas e benta di uittreksels, ta e entrada principal di KvK.

Costonan di operacion di KvK a subi door di inflacion pero tambe door cu nan kier a brinda un servicio adicional pa tur hende y p’esey nan a cuminsa cobra un fee pa e registro online riba nan website, ademas a trece dilanti cu ta un paso necesario pa por proteha e datonan y mantene e sistema sostenibel y duradero manera Balkestein a enfatisa.

A pesar cu e no ta un obligacion legal di KvK ta ofrece traduccionnan di uittreksels, cu e fin pa facilita esey na comunidad. Sinembargo, esaki ta un servicio adicional cu tin costonan adicional, y pa es motibo, e traduccion di uittreksels ta costa mas cu 15 florin manera ta stipula den ley. E costo adicional ta pa cubri e gastonan di traduccion, segun loke nan a declara.

Importante ta pa minister Wever por trece clarificacion riba e punto aki, manera a ser solicita recientemente.