Prome Minister Evelyn Wever-Croes (MEP) lo tin un reunion via teleconference cu prome minister di Hulanda Mark Rutte awe pa dialoga riba entre otro e problemanan financiero di nos isla. Ayera premier a reuni cu gobernador di Aruba entre otro pa dialogo general di con ta bayendo cu proceso di start gobernacion, pero tambe riba nos situacion financiero y stapnan cu lo mester bay tuma.
“Mi a toca retonan mas grandi cu nos a encontra durante e comienso di nos gobernacion,” minister Wever-Croes a declara na prensa ayera despues di sali for di oficina di gobernador. Awe e tin un reunion (via teleconference) cu prome minister di Hulanda Mark Rutte caminda lo trata algun tema y gobierno di Aruba lo trece dilanti e situacion real na Aruba segun premier Wever-Croes. Manera ta usual, locual cu e mandatarionan papia cu gobernador no ta den libertad pa trece pa dilanti pero a informa e gobernador di e situacion financiero. A informa e gobernador cu gobierno tin un plan, idea y vision riba con pa can’e. Ta trahando riba e plan pa tin un trayectorio riba con pa bin bek riba e curso corecto. Awor ta mustra cu e percentahenan menciona den e ley di Caft pa 2017 y 2018 no ta bay keda cumpli manera nos a trece dilanti ayera. Pero gobierno ta concentrando awor riba con si ta bay cumpli cu nan pa mas tempo cu ta posibel. Premier Wever-Croes a enfatisa riba e dos cartanan cu nan a haya for di Caft cu ta basa riba documentonan cu ta gobierno anterior a entrega na nan, y nan tur dos ta devastador segun e ta bisa. Caft su prome opinion riba gobernacion di e gobierno nobo lo bini riba e prome kwartaal di otro aña ora cu nan por papia di e ultimo kwartaal di e aña aki. Premier ta comenta cu berdad ex gobernantenan y ministernan actual por cuminsa tira culpa pero esaki e ta haya cu no ta yuda nos den nada. “Nos sa cu nos tin un problema. E problema ta grandi. Aworakinan nos sa unda nos tin cu cana pa busca un solucion y esey ta via Hulanda. Tira culpa riba otro hende no ta bay yuda nos,” el a bisa.
Espacio pa inversion
Minister Wever-Croes ta bisa cu loke nan kier yega na dje ta un trayectorio financiero caminda nan ta bay cumpli cu e obligacionnan cu nan tin. Pero mes momento e ta sigui bisa pa traha espacio tambe pa inversion den desaroyo economico pero tambe pa atende temanan social. Lo bay pidi Hulanda pa duna Aruba espacio segun premier Wever-Croes pasobra na momentonan aki e presion mas grandi ta bini di e palabracionnan hinca den e leynan di CAFT. Anto den esey nan mester poco espacio pa nan fiha nan plan. E siguiente paso cu nan tin cu haci ta bay fia placa segun e mandatario. Pasobra e ta bisa cu si pa cera e aña aki cu 100 miyon bo por ta sigur cu no lo por saca e placa aki for di pueblo for di ningun manera ni si bo kier. “Nos a dicidi cu nos no ta bay bati na porta di pueblo pa e 100 miyon aki. Nos ta bay fia esaki. Y pa fia e placa aki bo mester tambe e backup di Hulanda. No necesariamente mester nan aprobacion, pasobra si bo por hay’e localmente, teoreticamente bo no mester Hulanda su aprobacion,” e ta bisa. Premier Wever-Croes ta mastanto spera cu Hulanda por duna Aruba un oke pa bay den e direccion aki.
Dos carta pa contesta CAFT
Mientrastanto ex gobernantenan ta expresa cu nan si a cumpli cu tur locual tabata e normanan.
“Sea nan no sa kico nan ta bisa of nan no sa cu kico nan a cumpli,” tabata prome minister su reaccion riba esaki. Gobierno a haya dos carta for di Caft cual tin nan hopi preocupa pasobra nan mester wordo contesta. E prome carta tin di haber cu reportahe di e tercer kwartaal di 2017 (uitvoerings reportage derde kwartaal.) E tercer kwartaal a termina riba 30 di september cual ta cay bao constelacion di gobierno anterior. Caft eynan caba ta duna un opinion devastador riba e situacion financiero bisando cu na tur probabilidad e no ta bay logra. Gobierno pues tin dos siman pa contesta e carta aki. Pero awo nan a haya un otro carta basa riba loke ex minister Bermudez a pidi Caft. Prome cu Bermudez a baha como minister segun minister Wever-Croes, el a pidi Caft pa duna conseho riba presupuesto supletorio di 2017. Gobierno actual a haya esaki siman pasa den nan man caminda cu Caft ta bisa cu e presupuesto supletorio cu minister Bermudez a traha no ta cumpli cu normanan. No a tene cuenta cu entradanan kedando atras of aumento di gasto. Premier a subraya cu e tema financiero tin hopi reto su dilanti y awor tambe mirando cu nos no ta bay logra loke ley ta prescribi pa logra; pues pa cera e aña sin ningun deficit adicional. Premier Wever-Croes ta subraya cu awor ta mustra cu nos ta bay cera deficit cu casi 100 miyon florin adicional y esaki ta un reto naturalmente grandi. “Ta importante pa gobernador ta bon informa di e situacion financiero pa asina ora cu bin pregunta of cualkier comentario di parti di Hulanda e lo por duna esaki tambe.”
‘No por a start sali facil’
Den e reunion cu gobernador ayera pa di dos biaha despues cu e ta minister president, el a dialoga cu gobernador tambe riba e proceso den general pa cuminsa funciona como gobierno. Riba dje ayera tambe tabata premier su cumpleaños tambe. E bishita di ayera tabata uno regular pa gobernador scucha e ultimo desaroyonan y con ta bayendo cu tur cos te cu awo. Segun e premier, el a comparti cu gobernador cu e prome pasonan sigur tabata un poco duro, pues cu no por a start sali facil.
Manera el a yega di papia di dje el a bolbe menciona ayera cu “basta atencion mester a bay den e organisacion di Bestuurskantoor. Pa via cu no tabata tin documentonan of computer pa nan funciona drechi.” Dialuna nan por a cuminsa atende telefon cu telefonista den servicio, pero telefonnan no ta funcionando ni tin caminda pa pone e telefonnan segun e premier a laga sa. Tin algun cos ainda strobando nan pa traha optimalmente pero esey no ta laga nan stop nan segun minister Wever-Croes; cada minister a cuminsa nan rondanan caba topando cu diferente departamentonan. Falta solamente minister di Finansas y premier mes pa caba cu e fase aki.
