Recientemente Fundacion pa Hende Muhe den Dificultad (FHMD) a ricibi un tremendo acogida, y pa e motibo aki Orange 2016 tawata un decision facil pa sigui cu e Orange y hacie algo anual.
“Mundialmente estadisticonan ta mustra cu increiblemente 1 den cada 3 muhe ta experiencia violencia fisico of sexual den su bida- un pandemia di proporcionnan mundial.
E violencia contra hende muhe/mucha muhe ta uno cu ta basa riba e motibo di nan sexo, pues a base di genero. Pero al contrario cu un malesa, abusadonan y hasta sociedadnan henter ta scoge pa comete violencia y pues por scoge pa stop violencia tambe. Violencia no ta inevitabel. E por wordo preveni. Al contrario na un malesa, aki no tin vacuna, remedi of cura. Prevencion pa cu violencia ta exigi un plan di atake holistico cu intervencion di varios actornan y partnernan den comunidad.”
Fundacion pa hende muhe den dificultad a tuma e concepto aki di haci uzo di e color oranje, cu ta simbolo internacional di un futuro y un mundo liber di violencia contra hende muhe y combina esaki cu 16 dia di conscientisacion. Ta cuminsa dia 25 di november cu ta dia Internacional pa cu violencia contra hende muhe, y ta termina 10 di december cu ta dia Internacional di Derechonan Humano.
Aruba como pais chikito no por yama su mes un pais civilisa of sostenibel si violencia, den tur su forma, contra hende muhe y mucha muhe ta ser permiti y acepta como algo normal.
Kico ta Orange? Na aña 2008 e Unite campaign to End Violence Against Women, lanta pa e UN Secretary-General Ban Ki-moon, a haci un yamada riba tur gobierno di tur pais na mundo pa un accion global pa crea mas conscientisacion pa cu e problema di violencia contra hende muhe. E yamada aki tawata na 2015 pa pinta edificionan gubernamental na e color oranje.
“Pakico FHMD ta sinti su mes yama pa actua? Nos statuut ta exigi di FHMD pa promove y para pa e derechonan di e hende muhe. Nos statuut ta exigi di FHMD pa stop violencia en particular contra di hende muhe. Nos statuut ta exigi di FHMD pa stop en particular violencia domestico”, asina e fundacion ta bisa.
“Pues ta mas cu logico cu esaki mester bira parti di e lucha di FHMD. Como tal nos ta acepta e reto di Secretario General Ban Ki Moon y ta yama Aruba pa 16 dia di conscientisacion contra di violencia di hende muhe/mucha muhe.
FHMD a adopta e parti di e Unite program di 2015 como algo cu nos ta bay haci anualmente. Nos kier pinta Aruba Oranje pa 16 dia cuminsando riba november 25 (Dia Internacional pa cu Violencia contra Hende Muhe) y terminando december 10 2017(Dia Internacional di Derechonan Humano) y combina esaki cu varios programa di conscientisacion.”
