Minister Otmar Oduber kende ta minister di Transporte den cual departamento Maritimo ta resorta, pero tambe minister di Turismo a referi riba e ferry cu supuestamente tin intencion di opera otro luna.
E mandatario a reafirma cu ainda e instancianan y autoridadnan gubernamental no ta na altura di e operacion di un ferry di e compania Naviera Paraguana cu lo nabega den su prome fase e ruta Guaranao-Aruba Guaranao, eventualmente na final di luna di october venidero.
E mandatario a indica cu den medio di comunicacion el a haya sa di e ferry aki cu kier cuminsa su operacionnan na Aruba. El a bisa cu pa su ministerio “en todo caso esaki tabata un misterio”. Nan no a tene niun reunion “en todo caso conoci” cu e intencion cu tin un ferry Venezolano cu kier brinda su servicio na Aruba.
Minister Oduber a declara cu el a acerca su director di departamento Maritimo, Sr. Carlyle de Coteau pa sa si nan tin mas informacion riba e asunto di e ferry aki. Den e combersacion aki el a tuma nota cu en berdad e grupo aki dos pa tres aña pasa a mustra un intencion di cuminsa opera un ferry entre nos islanan tendiendo Venezuela como punto di origen. “Pero pa dos of pa tres aña no a tende nada mas te cu e anuncio cu a wordo haci recientemente”, el a bisa.
El a bisa cu tur informacion cu e ta maneha ta di prensa. E mandatario no ta descarta cu un tipo di operacion di un ferry enter Venezuela y Aruba, lo por ta posibel, considerando cu den principio e unico instancia cu e compania aki mester acerca ta APA.
Preparacion prome
Encuanto aceptacion di operacion di un ferry, e mandatario a indica cu algun sector politico representa den parlamento manera PDR a pone hopi atencion y sosten pa bin cu proyecto di ferry entre islanan. Pero e ta haya cu prome cu un proyecto asina ta cuminsa, nos autoridadnan local muy particularmente cuerpo di Duana y Inmigracion, mester ta prepara. Nan mester tin tanto personal como ekiponan pa atende cu e tipo di operacion aki entre islanan y cu Venezuela tambe, si esaki ta wordo origina si of no for di e pais bisiña.
E operacion di e ferry no solamente ta demanda e facilidad di un alocacion pa e por yega den cualkier di nos wafnan, sino un maneho, entre nan riba maneho di admision, pero tambe di control di parti di Inmigracion y Duana.
Nan mester evita y sigura cu un cantidad di ilegal no keda atras den nos isla. “Esaki ta fenomeno cu bo mester keda atento riba nan”, el a bisa.
Te hasta cierto momento, ora cu e ola di Venezolano cu a bin Aruba a aumenta, e mandatario a corda cu el a papia di bin cu un visa, ya cu bo por yega cierto momento cu bo no por controla nan.
“Si bo no tin un visa introduci, bo tin cu acepta cu bo tin un porta habri pa e pais ey, den e caso aki ta Venezuela…”, el a indica. E visa ta e unico instrumento legal factibel pa controla y regula e fluho di pasaheronan cu ta bin di un pais specifico mas miho. Pero Reino Hulandes a opta pa no tin visa, el a declara.
E mandatario a bisa cu operacion maritimo ta mas habri cu operacion aereo. Na momento cu nan autorisa e operacion di e ferry, APA mester notifica e demas departamentonan envolvi oficialmente, pero te ainda niun di e instancianan aki a wordo notifica. Asina a sali na cla durante un reunion cu departamento Maritimo a pidi dialuna ultimo cu APA, Duana y Inmigracion. E conclusion den e reunion aki tabata ta cu nos instancianan mester ta bon prepara prome cu un ferry cuminsa su operacion. Y e ta un proceso ainda cu ta tuma su tempo.
Turismo
Como minister di Turismo e ta haya cu rond di operacion di un ferry ta wordo papia cu nan tarifa lo ta mas barata. Pero nan tarifa lo por ta un tarifa similar tambe cu e aerolinea por ofrece ora cu e turista ta busca nan divisa den dollar riba mercado paralelo na Venezuela.
El a bisa cu e tempo cu e fenomeno conoci como “raspa tarheta” tabata den su furor, e prijs di ticket aereo a yega di costa entre 50 pa 70 dollar, cu ta casi e mesun prijs cu a wordo anuncia dor di e compania di ferry.
Pero e politica monetario cu gobierno di Venezuela a bin cu ne luna di maart ultimo riba Cadivi, esaki no ta haci facil mas e acceso di cupo den dollar pa medio di tarheta pa bin Aruba pa raspa nan, y pa nan bay cu dollar bek pa cambia nan pa Bolivar cu ta cumbini nan fuertemente.
E mandatario a indica cu debi cu no tabatin un visa, nos por a mira un gran cantidad di Venezolano bin Aruba, cu a marca un crecemento den dos aña di tempo di casi 150 pa 200 mil Venezolano adicional. Nan tabata Venezolanonan cu no tabata cuadra cu e profiel di e turista cu en berdad nos industria turistico ta buscando.
E ta destaca cu nos no por nenga cu nos cercania cu Venezuela ta keda un realidad, considerando –segun e por compronde- cu e ferry aki lo sali for di Punto Fijo, situa apenas 25 miya for di nos isla.
