Un persona cu a keda deteni pa motibo di uso of posesion di substancia prohibi no por bira Minister, pero segun Prome Minister Evelyn Wever Croes, e substancia prohibi (droga) no ta referi na Cannabis (Marihuana). Esaki el a bisa den e reunion informativo di Parlamento diamars ultimo.

E interpretacion di Prome Minister mester ta mucho mas defini den e ley di Screening di Candidato di Minister y Minister Plenipotenciario, segun e conseho di Raad van Advies.

E Organo Consultativo a bisa cu a constata cu a tene cuenta cu diferente conseho duna pa e ley. Pero di otro banda ta lamenta cu no a mara e exigencia di screening na Parlamentarionan por ehempel. Pa Raad van Advies esaki ta un deficiencia den e ley.

Raad van Advies ta ripiti un conseho anterior cu mester por pone un base legal hopi fuerte pa stimula integridad politico, ademas di limita e riesgonan di integridad.

A mustra cu a tene un coordinacion y alineamento cu e comision Fortificacion Sistema Democratico. Sinembargo, ni e contenido, ni e resultado di e deliberacionnan riba e tema a aparece ni den e informacion cu Minister envolvi a manda na Gobernador riba e proposicion di ley y tampoco den e Memorie van Toelichting, MvT (Splicacion di ley), di e ley

Raad van Advies ta considera cu ta necesario pa e MvT enfoca explicitamente riba e tema aki, y si no sigui e recomendacionnan pa amplia e dimension di e ley di Screening pa tur cu ta carga responsabilidad politico, anto mester bin otro proposicion di iniciativa mas pronto cu ta posibel pa garantisa cu miembronan di Parlamento tambe ta cumpli cu tur regla di integridad.

Observacionnan

Den cuadro di e punto aki, Raad van Advies tin algun remarca riba e proposicion di ley mes y su MvT. Por ehempel, no a a inclui e necesidad di screening pa e reemplasante di e Minister Plenipotenciario. Tampoco a inclui casa of pareha di yiunan di crianza como miembro di famia. Mester splica di con no a haci esey. Tambe a kita e rekisito pa un analisis medico manera ta exigi pa tur ambtenaar. Un Minister mester demostra cu e tin e capacidad fisico y psikico pa e trabao en cuestion.

Pa sigura obhetividad, e dokter cu mester haci e analisis mester ta uno cu no tin un relacion directo cu e candidato pa Minister of Minister en cuestion. Aparte di e companianan cu e candidato por tin un interes den dje, Raad van Advies ta kere cu mester amplia e articulo relaciona cu esaki cu e funcionnan den directivanan of maneho cu e persona en cuestion a keda di ocupa. Motibo ta cu e ta keda personalmente responsabel pa belasting y tambe primanan na seguronan social, manera SVB.

Ademas, e amplitud di e palabra ‘empresa’ menciona den e ley (onderneming) no ta suficientemente cla pa Raad van Advies. Aki mester bin uno cu ta duna mas claridad.

Mas ainda e proposicion ta bisa cu e evaluacionnan general di e investigacion fiscal ta bay na esun cu ta autorisa pa ricibi e informacion.

Pero no ta splica e articulo mes. Raad van Advies ta opina cu pa ley, e persona autorisa pa ricibi e datonan fiscal, no por ta ningun otro cu no ta Gobernador, e Formado di Gobierno, y tambe e Presidente di Raadn van Advies.

Ta sugeri pa trece cambio den e articulo, y pa haci’e similar na locual ta describi den e articulo riba e investigacion di siguridad.

Crimen

Den articulo 7 di e proposicion di ley ta determina bao cua circunstancia e formado por keda sin presenta e candidato pa Minister. Pero, den opinion di Raad van Advies, falta e motivacion pakico a scoge e argumentonan. Como tal, e organo di consulta ta ripiti manera a haci den un evaluacion anterior, cu e ta di balor esencial pa articulonan ta substancia cu splicacion adecuado. No ta tene cuenta cu e tipo y seriedad di un crimen of infraccion ni e tempo cu esakinan a transcuri. No por perde e principio di proporcionalidad for di bista, ora di limita risiconan di integridad, y cu mester balansa interesnan cu mester keda presenta na Gobernador.

Substancia prohibi (droga)

Algo cu a bin na discusion den Parlamento diamars, tabata e uso y posesion di substancianan prohibi, Esaki segun e ley ta motibo pa exclusion pa un persona bira Minister. Prome Minister a bisa cu no ta papia aki di Cannabis, pero Raad van Advies ta considera cu no a ni motiva ni splica di con a agrega e parti aki den e ley.

Tambe a crea un base legal pa un comision di conseho cu ta encarga pa stipula y entrega un raport confidencial riba eventual kehonan contra un candidato pa Minister. Pero falta mas splicacion segun Raad van Advies. Mester tin claridad riba e pregunta si ta trata di un investigacion na e keho of si ta investiga si e persona ta un sospechoso. Raad van Advies ta kere cu mester tin claridad con e comision lo anda cu e kehonan aki.

Tampoco tin claridad riba e composicion completo di e comision, cu ademas mester tin su base legal.

Funcion Prome Minister

Raad van Advies a constata cu no a regla na ken Minister President mester informa di cambionan den su interes y condicionnan personal. E MvT ta papia cu e mester informa e Vice Prome Minister. Raad van Advies ta kere cu e frase aki mester ta explicitamente formula den e ley mes.

Pa loke ta cumplimento cu ley, entre otro, e prohibicion di un di dos trabao (nevenfunctie) y obligacion di duna declaracion por escrito si circunstancianan persona a cambia, no ta suficientemente regla.

E iniciadonan di ley a bisa cu e responsabilidad na prome luga ta cerca e propio Minister, sigui pa Minister President y cu Parlamento na ultimo por tuma e decision pa kita confianza. Pero Raad van Advies ta kere cu mester tin un bon mecanismo di control describi den e ley como parti di ‘checks and balances’ durante e periodo di funcionamento di e Minister. Mester pone concretamente ki tempo e Minister mester duna declaracion anual riba su posicion.

Otro cambio di Raad van Advies kier wak ta den e articulo di e proposicion di ley, cu ta bisa cu u e Minister no por atende e reunion di Conseho di Minister ora ta tuma decision cu ta na interes di un famia of relacion di e persona en cuestion. E organo di consulta ta kere cu e Minister no por ta envolvi en absoluto den e proceso cu a cana prome, esta ora cu ta prepara y discuti e nombracion.