Mester bin mas conscientisacion pa abandono y maltrato di cacho

Centro di Control di Cacho (CCC) a bin reportando cierto situacion cu nan ta enfrenta como instancia: diariamente nan ta haya cacho bandona dilanti nan luga of casonan di maltrato severo unda mester pone e bestia drumi pa no sufri mas.

Mediante diferente publicacion haci riba red social Facebook, por a mira potret di cachonan bandona y un di nan cu tabata un caso hopi cruel di maltrato, cu a hala atencion di usuarionan. Nan a conta cu nan a ricibi un cacho cu cadena di hero pega den e cuero di su garganta. E cacho aki a wordo mara desde chikito y esaki a drenta den e cuero “y pa hopi tempo NINGUN hende, ni e doño a los e cadena.”

Nan tambe a informa cu ora el a yega CCC ya caba e herida tabatin infeccion y a coba bay basta diep den e cuero.

“E cacho aki a wordo poni drumi pa asina e no sinti dolor mas. Pero e caso no a keda te aki.

CCC cu colaboracion di Unit di KPA a bay back na e doño y a duna e persona aki un boet pa no a cumpli cu su responsabilidad como doño di e cacho aki.”

Lamentablemente, casonan asina tin hopi, pero esaki no ta hacie aceptabel. Ley ta existi y cu colaboracion di KPA, ta bay sigui reenforsa esaki pa asina comunidad di Aruba por cuminsa realisa cu abuso di animal no ta bay sin castigo.

“Nos no por salba tur na mes momento, pero un pa un nos ta yuda nan,” nan a sigura.

Di mesun manera, a informa di otro caso di un cacho di rasa chikito, un chihuahua di nomber “Coco” cu riba potret ta mustra hopi tutu mes, pero tambe a bira victima di personanan iresponsabel cu a lag’e pa su suerte dilanti CCC.

E cacho aki tin su doño, pero asina mes el a wordo bandona na unda CCC tin video y informacion di e doño. Prome cu duna un boet, nan a dicidi mediante e publicacion pa tuma contacto cu CCC y haya sa kico ta e situacion, di dicon a laga e bestia chikito aki bandona, y por tuma e decision corecto cu por ta otro di busca un doño nobo responsabel.

Abandono y maltrato ta bay contra ley di cacho. Ta importante pa comunidad en general cuminsa actua den esaki, pa ta doñonan mas responsabel y cuida mascotanan cu tambe ta sinti y ta sufri.