Aruba no solamente ta un pais rico den arkeologia terestre sino den arkeologia sub acuatico. Tin sitionan, artefactonan y diferencia area cu tin material arkeologico den nos lama teritorial. Ta asina cu pa prome biaha Museo Arkeologico Nacional di Aruba (MANA) ta publicando nomber, luga y informacion di sitionan sub acuatico na Aruba.

E arkeologo y director interino di MANA, Raymundo Dijkhoff a declara na Bon Dia Aruba cu tin minimo 9 sitio sub acuatico na Aruba. Pero nunca a wordo haci un reconocimento structural den nos awa teritorial. Si nos ta bin cu un trabou asina, e no tin duda cu nos lo por haya mas cu 200 sitio sub acuatico di balor arkeologico.

E experto aki ta considera cu mester haci un inventarisacion mas profundo di e sitionan cu un importancia di arkeologia sub acuatico. Pero ya caba alomenos tin un inicio pa nos pueblo tambe bira mas consciente. Un aspecto importante tin di haber pa bin cu ley riba maneho maritimo, pero teniendo cuenta cu e parti cultural tambe. “Nos tin hopi cultura den nos awa teritorial cu mester di proteccion debido”, segun e arkeologo Dijkhoff.

El a splica cu sitio sub acuatico por ta prehistorico tambe ya sea restonan di barconan y diferente material cultural cu a keda atras. “Hopi hende ta kere cu ta barco, pero e por ta un avion tambe”, el a bisa.

El a pone como ehempel cu durante II Guera Mundial un avion a cay den nos awa teritorial y nan sa unda el a cay. Encuanto e presion di actividad acuatico manera dive pa nos turistanan, e ta haya cu si nos por sa con pa atende cu e factor aki, nos por saca probecho di dje. No solamente como parti cultural y di identidad, pero alabes e ta hopi importante pa complementa cu e parti economico di nos turismo.

MANA ta un museo cu ta enfoca riba e parti terestre, ya cu e parti maritimo ta full otro area. E ta haya cu ta bon pa bin cu un diversificacion y asina nos por tin mas specialista riba e tereno ey. Un aspecto importante ta cu nos mester tin legislacion adecuado pa protege e sitionan aki, pero esaki mester bin for di parti di gobierno.

El a bisa cu nan tin 18 aña pushando un ley asina y te hasta aña pasa conseho di minister a bay di acuerdo cu un proyecto pa bin cu legislacion pa e parti di arkeologia cu ta inclui e parti terestre y sub acuatico. “Bo tin cu compronde tambe cu bo mester un maneho. Presentacion ta un cos, maneho ta otro cos y educacion ta otro cos atrobe”.

Recientemente el a duna un charla riba e hallazgo y investigacion haci riba e wesonan di un naufrago descubri den e area di Boca’i Brik na altura di Natural Bridge. Ta trata di un barco di bela Aleman di nomber Hero cu a naufraga cerca di nos isla pa causa di un horcan na 1886. Aunke e naufrago aki a wordo dera riba tera, e barco estilo brik a zink den nos awa teritorial y e ta un hallazgo cu tin un parti di arkeologia terestre y maritimo