Fin di siman ultimo, par di turista e keda envolvi den un incidente na lama caminda nan a bay landa na Baby Beach y nan a haya dificultad pa sali back. Esaki a pone autoridadnan den careda pa por rescata e dos persona aki. Relaciona cu e incidente aki, ta importante pa trece dilanti y informa tocante e areanan di landamento na Baby Beach y nan peligernan.

Recientemente, riba rednan social un usuario a comparti su preocupacion pa loke ta trata Baby Beach, un luga basta bishita pa turistanan, pero mester tene na cuenta cu aunke e mayoria di area ta “sigur” pa tur hende landa, tin cierto punto manera e boca di de rif cu ta basta peligroso cu turistanan y algun local no ta conoce e riesgo na e parti aki unda tin basta coriente.

Loke a sucede diasabra ultimo cu dos turista hoben no ta algo nobo, ta normal cu turistanan ta yega Aruba pa su beachnan bunita, pero no tur parti di e beachnan ta sigur pa landa si no ta conoce e area, specificamente un parti di Baby Beach cu debi na coriente basta fuerte por push e persona pa bay mas afo cu consecuencianan cu por ta hasta mortal manera a sucede varios biaha.

Aunke ta un post di red social, el a hala basta atencion di hendenan cu a reacciona y hasta a pidi un solucion na instancianan concerni pa coloca mas borchi informativo y cu por hala atencion den diferente idioma na un parti di e beach, pa turistanan y hasta local haya sa cu tin un parti di e beach cu ta peligroso.

Igualmente, a señala cu un toren cu un lifeguard lo ta bon entre otro recomendacionnan, manera pone boeinan cu tabatin algun tempo pasa y despues a kita nan y no a ponele mas.

Un usuario cu a reacciona na e publicacion a señala cu “mester papia cu e piscadonan bieu cu antes tabata pisca den Colony anto por splica e peligro di e boca ey.”

Den otro comentario a haci un peticion na minister encarga cu Turismo Dangui Oduber pa atende e asunto aki: “mi tin un sugerencia pa gobierno vooral minister di turismo cuminsa pensa den e direccion pa pone dos lifeguard station eynan y cu personanan cualifica como rescue swimmers y cu tin e base di BLS quo ta Basic Life support pa por sikiera cuminsa cu e prome handelingnan, den caso di emergencia si algo pasa esey pa mi lo ta un solucion sigur cu lo preveni mas caso di hogamento, traha preventivo y no warda e baca hoga na pos.”

Potret ta pertenece na Aruba.com su website.