Parlamentario drs. Mervin Wyatt-Ras desde december cu e prome caso di Corona virus a surgi na Wuhan-China a manda pregunta pa minister di salud y despues pa di dos biaha a bolbe manda pregunta pa nos Pais prepara nos mes debidamente. Wyatt-Ras ta considera positivo cu e acuerdo firma na 2015 pa loke ta trata International Health Regulations entre paisnan den Reino sigur lo beneficia cooperacion entre e paisnan aki y WHO y PAHO.

Sinembargo te diaranson cu a pasa gobierno a core bin Parlamento pa duna cierto splicacion y awe ta resulta cu tin 2 caso. En bista di consecuencia di e virus aki pa e economia y finanzas di e paisnan infecta y manera Wyatt-Ras mes a bin ta trece padilanti cu nos ta un pais turistico a spera cu Aruba lo a prepara miho pa detecta casonan. Por a tende cu al fin gobierno a anuncia den Parlamento cu e tin un plan di contingencia aunke no ta cla kico esaki ta contene. Segun Wyatt-Ras gobierno mester cancela tur e medidanan cu tin den e presupuesto 2020 cual nan ta devastador pa e cartera di nos ciudadanonan y lo hiba nos hendenan den pobresa. Ta inaceptabel cu gobierno den dia cla kier atraca nos ciudadanonan.

Gobierno cu cooperacion di Mep-POR-RED kier bulldoze e presupuesto dor di Parlamento. Dia 4 di maart cu porfin gobierno a manda e presupuesto 2020 Parlamento pa wordo trata e presidente di Parlamento a bisa Gobierno Si Amen y a pone e presupuesto riba agenda e mesun dia y stipula hunto cu coalicion cu mester entrega pregunta dia 14 di maart.

Parlamento a haya solamente un siman y pico pa lesa y traha pregunta di un documento cu gobierno a haya 7 luna pa traha y “ploeter” riba dje. Aki por papia di un deficit democratico grandi. Manera tabata di spera e gobierno sin berguensa a bolbe presenta un serie di medida pa atraca cartera di nos ciudadanonan. Den comienso gobierno por a uza e excuus di mega debe, mientrastanto tur hende sa cu e medidanan aki ta pa paga gastonan exuberante y fiestanan di e gobierno aki. Paso un cos ta sigur gobierno su gastonan a aumenta en grande. Esey ta un di e criticanan di Raad van Advies cu di un banda gobierno ta busca forma di aumenta su entradanan dor di medidanan riba lomba di pueblo mientras cu di otro banda gobierno no ta baha su gastonan.

Pa loke ta trata e medidanan por conclui cu Gobierno lo introduci un BBO di 6% na frontera cu mester bai genera un suma di 36 miyon florin, un aumento di deviezenprovisie di 1.3 pa 1.9% cual lo genera 23 miyon florin. E medidanan aki lo afecta e poder di compra di ciudadanonan y tambe e ”cost of doing business” di comerciantenan, kendenan lo aumenta prijsnan. Tambe lo aumenta toeristenheffing cu lo genera 15 miyon florin. Specialmente awor cu tin riesgo di Corona virus riba nos mercado turistico gobierno dor di e medida aki ta haci esaki mas caro dor di cual ta menos atractivo pa turistanan bin Aruba.

Parlamentario Mervin Wyatt-Ras ta lamenta cu e gobierno aki desde cu e ta na mando solamente a ocasiona crisis, esta crisis financiero economico, crisis social y awor crisis di salud. Djis ta bay pa mas crisis. Paso en bes cu gobierno scucha nos pueblo y para banda di nos hendenan e ta bezig cu su mes, su amigo y famianan. Mescos cu tur otro pais e gobierno aki mester mustra awor seriedad, madurez y convicencia cu nos hendenan y cancela tur medida. Nos ta bay tin un tempo dificil nos dilanti y ta necesario cu nos hendenan tin mas espacio financiero pa sobrevivi. Wyatt-Ras ta spera cu gobierno por reconsidera y yuda nos hendenan en bes di castiganan cu medida.