Mervin Wyatt-Ras, si partido AVP o a tabata na Gobierno cu crisis Covid: ‘Nos lo a sinta pa yega na proposicionnan unda por corta’

Diahuebs mainta, lider di partido AVP, Mike Eman hunto cu parlamentario Mervin Wyatt-Ras a haci un bishita na hospital Dr. Horacio Oduber, durante cual nan a haya un recorido na man di director di hospital y diferente dokter. E accion aki a causa un molester cerca un minister di gobierno.

Durante un entrevista cu Bon Dia Aruba a haci cu parlamentario Mervin Wyatt-Ras, el a splica cu nan a pasa den e diferente departamento unda ta traha tambe cu pashentnan di Covid-19, y nan a hiba diferente conclusion cu personanan cu ta traha den e departamentonan. Di e manera aki nan a wordo informa di e cantidad di casonan di Covid-19 na momento cu Aruba ta enfrentando su di tres ola di Covid-19.

El a splica cu e casonan a aumenta na hospital, na unda nan no solamente tin di haci cu e casonan aki aumentando, sino cu tambe cu personal di hospital ta birando malo. Presion riba dokternan cu ta traha cu pulmon ta hopi halto y pa e motibo ey nan kier a duna atencion na esaki di un manera special, segun loke Wyatt-Ras a sigura, pa motibo cu ta corta den area di cuido.

Asina mes, el a señala cu tin diferente cosnan cu a wordo haci caba y un di nan ta cu e dokternan specialista y esnan cu ta traha den cuido lo mester entrega 60 miyon florin na fin di aña pasa, kiermen 5 miyon pa luna, y esey lo continua.

Di esaki, dokter y specialistanan a trece dilanti na parlamento den un carta cu nan no por cu e situacion aki. Nan a mustra cu cortamento den AZV lo influencia con nan trabao ta bay ta, lo influencia e calidad di cuido cu nan ta duna na nan pashent y, door cu tin menos placa, e cantidad di cuido cu nan por duna ta bira menos.

El a informa cu nan a bay parlamento caba cu e carta aki, cu a drenta dia 13 di januari ultimo, y lo cual cu ta remarcabel segun Wyatt-Ras a expresa ta cu nan a haya un splicacion na unda tur hende cu ta bisa cu AZV ta corta den cuido. Sinembargo, “como si esey tabata culpa di Hulanda ta wordo treci dilanti. Pero ora cu nan a mira e carta tambe di diferente stakeholders ora cu secretario di Estado Raymond Knops tabata di bishita na Aruba, el a laga sa cu no ta necesario pa corta den cuido”, el a afirma.

Den e carta a conclui cu “tin espacio pa hunto traha na diferente reforma structural en bes di tuma tur e medidanan aki”. Tambe nan a trece diferente proposicion cu conhuntamente cu gobierno nan por yega tambe na un miho forma, “si mester corta, mester bay den un forma adecua”, el a manifesta

E carta aki Wyatt-Ras a comenta cu nan a mand’e pa gobierno, pero nan no a haya oido di gobierno y “nos di AVP a bay duna oido na nan”, el a destaca.

Ayera atardi riba rednan social tambe a ser conoci un reaccion di minister di Asuntonan Economico, Cultura y Finanzas, Xiomara Maduro, tocante e bishita cu Eman y Wyatt-Ras a haci na hospital. El a comenta cu cortamento den cuido medico lamentablemente tabata un di e condicionnan di Hulanda pa Aruba por a haya pa atende e crisis di likides y brinda ayudo pa comercio tene cupo di trabao.

“P’esey ora mi mira un lider politico cu no ta den parlamento y un parlamentario sali hunga cu sentimento di hende, manipula y gaña, mi ta haya un tristesa. Pasobra nan ta hunga cu dolor di un pais. Ta ki tipo di mente y curason por haci algo asina aki durante un pandemia?” Maduro a skirbi riba su pagina di Facebook.

Wyatt-Ras a reacciona riba esaki y a bisa cu esaki ta “como si fuera cu no ta berdad cu gobierno ta esun cu a dicidi pa corta den cuido y esey ta un decision di gobierno. Y ora AZV a hay’e cu tambe lo bay haci pasobra nan ta depende di e landsbijdrage cu gobierno ta duna na AZV”.

Den informacion di diferente rapportnan cu tin aworaki cu nan por haya, Wyatt-Ras a bisa cu un di nan ta un reaccion di Knops riba un peticion cu el a haya for di un organisacion na Aruba pa asina e por stop e medidanan aki y Hulanda no pone e presion riba Aruba. Den esaki, “por bisa cu Knops ta trece dilanti cu dia 6 di mei 2020 cu CAft a trece e punto dilanti, otro biahanan tambe. Esaki ta un advies di CAft cu Conseho di Minister di Aruba a bay di acuerdo cune, pa asina bin e diferente medidanan den cuido.”

Bon Dia Aruba a puntra Wyatt-Ras si den un caso supuesto, pandemia aki a yega na e pais ora partido AVP tabata den gobierno, kico lo ta diferente?. El a contesta cu den caso aki di Covid-19, gobierno aki a handle e situacion di manera cu Hulanda mester a duna e sosten di likides na Aruba. Loke gobierno di AVP si lo a haci y gobierno aki no a haci, ta bay sinta cu e diferente gremionan y yega na kico ta e pasonan cu nan ta bay sigui, “bay sinta cu e stakeholders y wak unda por corta y unda no. Nan djis a impone 5 miyon pa luna pa corta den cuido, nan ta dicidi como gobierno y despues bay gaña cu ta AZV of Hulanda a haci esey, y esey no ta e forma di con AVP lo traha.”

“Nos lo a sinta manera semper, nos lider a splica tambe cu lo sinta den dialogo cu stakeholders pa asina yega na proposicionnan unda cu por corta si of no. E dunadonan di cuido mes ta bisa cu tin camindanan cu por corta den cuido y cu no ta toca e ader principal, pero e forma con a wordo haci aworaki no ta e forma corecto. Mi no por bisa aworaki kico, pasobra esey lo wordo dicidi conhuntamente cu stakeholders”, Wyatt-Ras a declara.

Igualmente el a afirma cu dunadonan di cuido kier sinta na mesa pa nan hunto cu Gobierno yega na formanan con pa yega na restructuracion di cuido.

Ademas, por destaca cu Bon Dia Aruba a purba di tuma contacto cu e mesun lider di partido AVP, Mike Eman, pa e por duna un declaracion tocante esaki. Pero te e ciere di edicion aki redaccion no por a haya contacto cune.