Mercurio ta dunando un show celestial pa habri otro siman, cu un parada a traves di solo, den bista di mayoria di mundo.
E planeta mas interno y mas chikito di sistema solar lo aparece como un punto preto dialuna mientras e ta pasa directamente entre Tera y solo. E ta cuminsa pa 7:35am.
E evento completo, di cinco ora y mey, lo ta visibel – si clima permiti – na Merca oriental y Canada, y henter Centro y Sur America. E resto di Nort America, Europa y Africa lo mira parti di e accion. Asia y Australia no lo por mira e show.
A diferencia di su transito na 2016, Mercurio lo logra casi un bull’s-eye e biaha aki, pasando practicamente den centro di nos strea.
E proximo transito di Mercurio lo ta te na 2032, y Nort America no lo tin otro oportunidad pa mira esaki te cu 2049. Habitantenan terestre ta ricibi apenas 13 of 14 presentacion di transito di Mercurio cada siglo.
Pa por mira e espectaculo, mester di proteccion pa wowo. Telescop of binocular cu filter solar ta recomenda. Tambe por uza bril di eclipse, pero Alex Young, astrofisicista solar di NASA, ta bisa cu lo mester di ‘vision excepcional’ pa mira e minusculo Mercurio.
Mercurio tin un diameter di 4,800km, compara cu 1.4 miyon kilometer di solo.
E lo core un caminda diagonal for di banda links pa banda rechts di solo dialuna. Maske e paso lo parce poco poco, Mercurio lo core a traves di solo na un velocidad di casi 241mil kph.
NASA lo transmiti e transito manera mira for di e Solar Dynamics Observatory den orbita, cu apenas un retraso breve. Cientificonan lo uza e transito pa tune nan telescop, specialmente esunnan den espacio cu no por ahusta manualmente, segun Young.
